۵ قیریم تاتار تورکو گؤزآلتینا آلیندی

روسیا گوونلیک گوجلری قیریمدا ائولرینه باسقین ائد‌ن ۵ قیریم تاتار تورکونو گؤزآلتینا آلدی.

قیریم دایانیشما پلتفورمون‌دان وئریله‌ن آچیقلامادا، یئرلی واختلا ساعات ۰۵:۰۰‌ده ائولرینه باسقین ائدیله‌ن ۵ قیریم تاتار تورکونون روسیا گوونلیک گوجلری طرفین‌دن گؤزآلتینا آلیندیغی بیلدیریلدی.

اوکراینانین خاریجی ایشلر باخانی کؤمکچیسی امینه جپار توئیترده "قیریمداکی روس ایشغالچیلارین قورخوتما و اذیت ائتمه‌ سیاستی داوام ائدیر" دئیه یازدی.

سحر ساعاتلاریندا قیریم تاتارلارینین ائولرینه یئنی بیر باسقین دالغاسی ائدیلدیگینی قید ائد‌ن جپار، ان آز ۵ نفرین ساخلانیلدیغینی ایفاده ائد‌رک آدلارینین روستم تایروو، جبار بئکیروو، زائور عبدالله‌یئو، رایف فوضییئف و روستم موراسوو اولدوغونو آچیقلادی.

 اوکراینا پرزیدنتی ولادیمیر زلئسکی، روسیا گوونلیک گوجلرینین قیریم تاتار تورکلرینین ائولرینه باسقینلارینا تپکی وئردی.

زلنسکی، توئیترده ائتدیگی آچیقلامادا، روسیانین قیریمدا بیر داها انسان حاقلارینی پوزدوغونو ایفاده ائتدی.

بو سحر قیریم تاتارلارینین ائولرینه باسقین ائدیلدیگینی و بعضی انسانلارین نظارته آلیندیغینی خاطیرلادان زلئسکی، بو قبول ائدیلمز ظلملرین ان قیسا زامان‌دا دوردورولمالی اولدوغونو و ساخلانیلانلارین سربست بوراخیلمالی اولدوغونو قید ائتدی.

زلنسکی دونیانی بو پوزونتولارا تپکی وئرمه‌یه چاغیردی.

اوکراینا خاریجی ایشلر باخانلیغیندان وئریله‌ن آچیقلامادا، ائدیله‌ن باسقینلارین قیناندیغی و بونون ۲۳ آگوست‌دا گئچیریله‌جک قیریم پلتفورمو ذیروه‌سی اؤنجه‌سی "تخریبات" اولدوغو بیلدیریلدی.