آخاردان آذربایجان‌لی شهید عائله‌سینه مکتوب
«بیر میللت، ایکی دؤولت» اولان تورکیه و آذربایجانین کدری ده سئوینجی ده بیردیر
ملی ساوونما باخانی حولوصی آکارین آذربایجان اوردوسونون وطن محاربه‌سین‌ده حربی عملیاتلار زامانی ساواش تاپشیریغینی یئرینه یئتیررکه‌ن شهید اولموش حربچیسی تانکچی واله ممی‌یئوین عائله‌سینه گؤندردیگی مکتوب آدرسینه چاتدیریلدی.
آذربایجانین ساوونما باخانی ذاکیر حسنووون تاپشیریغی ایله باخانلیق امکداشی، آلبای عبدالله قوربانی واله ممی‌یئوین دوغولوب بویودوگو یاردیم‌لی شهرینین کورک‌چی کندین‌ده شهیدین عائله عضولری ایله گؤروشه‌رک مکتوبو چاتدیردی. شهیدین مزاری زیارت ائدیله‌رک اؤنونه ساوونما باخانلیغی آدینا چلنگ قویولدو.
آکارین مکتوبوندا دئییلیر:
«شهید واله ممی‌یئوین سایین عائله‌سینه.
عزیز، قیمت‌لی ممی‌یئولر عائله‌سی،
شان‌لی آذربایجان اوردوسونون ارمنیستانین ایشغالی آلتین‌داکی تورپاقلارینی آزاد ائتدیگی ۴۴ گونلوک حماسه‌یه دؤنه‌ن مباریزه‌ده آغیر یارالانان واله ممی‌یئوین شهید اولماسی بیزلری درین‌دن اوزدو.
واله، وطن تورپاغینین ایشغال‌دان قورتاریلاجاغینا دایر وئردیگی سؤزو توتموش و قوبادلییا باغلی یاشاییش منطقه‌لرینین قورتاریلماسین‌دان سونرا شهادت مقامینا اوجالمیش‌دیر.
شهید و غازیلریمیزین جسارت، قهر‌مان‌لیق و فداکارلیقلاری اصلا اونودولمایاجاق. اونلارین عزیز خاطره‌لری سون‌سوزا قدر قلبیمیزده یاشایاجاق.
«بیر میللت، ایکی دؤولت» اولان تورکیه و آذربایجانین کدری ده سئوینجی ده بیردیر. سیزلرین سئوینجی سئوینجیمیز، کدری کدریمیزدیر. تورکیه بوتون ایمکانلاری ایله سونونا دک آذربایجان تورکو قارداشلاریمیزین یانین‌دا اولماغا داوام ائد‌جک.
شخصاً و ملی ساوونما باخانلیغینین امکداشلاری آدینا آجینیزی اورک‌دن پایلاشیر، عزیز شهیدلریمیزه الله‌دان رحمت، سیز دیرلی عائله‌سینه صبیر دیل‌ییر، باش‌ساغ‌لیغی وئریرم.
مناسیب بیر واخت‌دا عزیز شهیدیمیزین سایین عائله‌سی اولان سیزلری تورکیه‌ده قارشیلاماق‌دان ممنون اولارام.
سلام و احتیراملاریملا، حولوصی آکار».
حولوصی آکارین آذربایجانین اوجقار داغ کندین‌ده یاشایان شهید عائله‌سینه گؤندردیگی صمیمیتله دولو مکتوب بوتون کند ساکینلرینین بؤیوک سئوگی‌سی ایله قارشیلاندی. ممی‌یئولر عائله‌سی ده باخان حولوصی آکارا جاواب مکتوبو گؤندردی.
حولوصی آکار ۱۳ آوگوست ۲۰۲۰ده آذربایجان‌دا تشکیل ائدیله‌ن تورکیه-آذربایجان اورتاق مانوروندا، عسگرلردن بیری اولان واله ممی‌یئوه اؤدول وئرمیش و بیر مدت صحبت ائمیشدیلر.
آکار عسگرلره "مانوردا گوجونوزو گؤستردینیز چوخ گؤزل. آنجاق اساس وظیفه‌نیز ۳۰ ایلدیر ایشغال آلتین‌دا اولان تورپاقلارینیزی قورتارماق اولمالی‌دیر. باشارینیزی ساواش میدانین‌دا دا اثبات ائتمه‌لی‌سینیز" شکلین‌ده خطاب ائتمیشدی.
ممی‌یئو ده آکارا "باش قوموتان‌‌دان امر گؤزله‌ییریک. امر گلن کیمی تورپاقلاریمیزی آزاد ائدیب طلبینیزی یئرینه یئتیرجییک" شکلین‌ده جاواب وئرمیشدی.
ممی‌یئو، قوبادلی ویلایتین‌ده‌کی بیر نئچه یاشاییش منطقه‌سینین ارمنی ایشغالین‌دان آزاد ائدیلمه‌سین‌ده ایشتیراک ائتدیک‌دن سونرا یارالانمیشدی.
ممی‌یئو، معالیجه ائدیلدیگی زامان، "من آماجیما چاتدیم. قارداش تورکیه‌نین ساوونما باخانی آکارا وئردیگیم سؤزه عمل ائتدیم. وطن ساغ اولسون" دئمیش، بیر مدت سونرا شهید اولموشدو.
ایلگیلی‌لی خبرلر
قیرقیزیستاندا مافیا ماللاری ساتیشا چیخاریلدی
ساتیلان املاک، متشکیل سوچلار و فسادلا موباریزه چرچیوه‌سینده دؤولتین مولکیتینه گئچمیشدی
