دیارباکیردا ۱.جی قیلیچ آرسلانین ایتکین مزاری تاپیلدی
سلطان قیلیچ آرسلان، آتی ایله هابور چایینی گئچمک ایسترکن، ۱۴ ژوئن ۱۱۰۷ ایلینده، اؤزو و آتینین زرهی‌نین آغیرلیغی سببی ایله بوغولاراق حیاتینی ایتیردی
آنادولو سلجوق‌لو حؤکمداری ۱.جی قیلیچ آرسلانین دیارباکیرین سیلوان بؤلگه‌سین‌ده ایتکین مزاری تاپیلدی.
دیارباکیر دجله اونیورسیته‌سی رئیسی پروفسور دکتر محمد کاراکوچ، آنادولو سلجوق‌لو حؤکمدارلارین‌دان ۱.جی قیلیچ آرسلانین سیلوان‌داکی ایتیکین مزارینین تاپیلدیغینی سؤیله‌دی.
پروفسور کاراکوچ، "۱-جی خاچلی یوروشونه قارشی حماسی مباریزه‌سی ایله تانینان سلطان ۱.جی قیلیچ آرسلانین هابور چایین‌دا بوغولاراق شهید اولدوغو و سیلواندا باسدیریلدیغی بیلینیر، آنجاق مزار یئری معین ائدیله‌بیلمیر‌دی. ۲ تاریخ‌چی، ۱ صنعت تاریخ‌چی‌سی، ۱ آرکئولوگ و ۱ یازما اثر متخصین‌دن عبارت کمیسیونوموز، بیلگیلر ایشیغین‌دا سیلوان‌داکی محتمل یئرلری آراشدیردی و هر زامان یئرلی اهالی ایله تماس‌دا اولدو.
"گؤزل خبر بو هفته ایچین‌ده گلدی. سیلوانین مرکزین‌ده‌کی 'اورتا چشمه' مؤوقعیتینده 'زیارت' اولاراق بیلینه‌ن بو توربه‌ده‌کی ایکی مزارین قیلیچ آرسلان و قیزی سعیده خانیما عاید اولدوغو معین ائدیلدی" دئین کاراکوچ بونلاری علاوه ائتدی:
"آنادولو تاریخینه ایشیق توتاجاق بو گلیشمه‌نین دیارباکیر و سیلوان اوچون یاخشی نتیجه‌لر وئرجگینی اومود ائدیره‌م و امگی گئچه‌ن هر کسه، تشکر ائدیره‌م."
سلطان ۱.جی قیلیچ آرسلان کیم‌دیر؟
۱.جی قیلیچ آرسلان، آنادولو سلجوق‌لو دؤولتینین قوروجوسو قوتالمیش‌اوغلو سلیمان شاهین اوغلو و ایکینجی آنادولو سلجوق‌لو سلطان‌دیر.
۱۱۰۱ خاچلی یوروشونده اوچ آیری خاچلی اوردوسونا قارشی قازاندیغی باشاریلارلا، خاچلی حرکتینی دوردوردو و ایستانبول‌دان سوریه‌یه گئدن یوبون هم بیزانس، هم ده خاچلی اوردوسونا قاپانماسینی ساغلادی.
قیلیچ آرسلان، آتی ایله هابور چایینی گئچمک ایسترکن، ۱۴ ژوئن ۱۱۰۷ ایلینده، اؤزو و آتینین زرهی‌نین آغیرلیغی سببی ایله بوغولاراق حیاتینی ایتیردی.
