قوزیی قیبریس تورک جمهوریتینده پارتلاییش و یانغین باش وئریب
قوزیی قیبریس تورک جمهوریتینده پایتاخت لفکوشا و گیرنه آراسینداکی تاشکند کندی یاخین‌لیغینا دوشن بیر جیسیم‌دن سونرا پارتلاییش باش وئریب.
قوزیی قیبریس تورک جمهوریتینده پایتاخت لفکوشا و گیرنه آراسینداکی تاشکند کندی یاخین‌لیغینا دوشن بیر جیسیم‌دن سونرا پارتلاییش باش وئریب.
پارتلاییش دان سونرا اراضی ده یانغین چیخیب.
تهلوکه‌سیزلیک قوه‌لری‌نین هئچ کسین یاخینلاشماسینا ایجازه وئرمه‌دیگی بؤلگه‌ده آلوو‌لارین چیخدیغی موشاهیده اولونوب.
قوزیی قیبریس تورک جمهوریتی باش ناظیرینین معاوینی و خاریجی ایشلر ناظیری کودرت اؤزارسای شخصی تویتر صحیفه‌سینده یازیب کی، باش وئرن پارتلاییش‌لارین سببی سلاح انباری یاخود دا بیزه مخصوص بیر هلیکوپتر و اوخشار بیر هاوا واسیطه‌سی دئییل. حادثه یئرینده عسگر، پولیس و یانغین سؤن‌دورن‌لر تدقیقات آپاریرلار.
حادثه یئرینه باش چکن اؤزارسای داها سونرا وئردیگی آچیقلامادا بیلدیریب کی، ایلک دلیل‌لر پارتلاییشا سبب اولان جیسمین خصوصیتی‌نین یا پارتلاییجی بیر هاوا آراجی یاخود دا بیرباشا بیر پارتلاییجی (راکت) اولدوغونا ایشاره ائدیر. قالیق‌لار اوزریندکی یازی‌لار و دیگر ایشاره‌لر یاخین زاماندا دقیق شکیلده نه اولدوغونو باشا دوشمییمیزه کؤمک اولاجاق خصوصیتده‌دیر.
حادثه نتیجه‌سینده اؤلن یاخود یارا‌لانان اولمادیغینی قئید ائدن اؤزارسای یانغی‌نین سؤندورولدوگونو بیلدیریب.
شاهیدلر دوشن بیر جیسیم گؤردوک‌لرینی، سونرا بیر نئچه پارتلاییش سسی ائشیتدیک‌لرینی و آلوو‌لارین چیخدیغینی سؤیله‌ییب‌لر.
حادثه یئرینده آپاریلان تدقیقات‌لاردا بیر هاوا واسیطه‌سی‌نین موتور قالیق‌لارینا تصادف ائدیلیب.
قالیق‌لار اوزریندکی روسجا یازی‌لار دقت‌لری جلب ائدیب.
پرزیدنت مصطفی آکینجی، تورکیه-نین لفکوشا سفیری علی مورات باشچری و تهلوکه‌سیزلیک قوه‌لری قوموتانی ژنرال توفیق آلگان دا حادثه یئرینه گله‌رک تدقیقات‌لار آپاریب‌لار.
آکینجی "بؤلگه‌دکی قارشی-دورمانین بیزیم پاییمیزا دوشن پیس نعمت‌لریندن بیری. ایلک معلومات کیمی بونو سؤیله‌یه بیلریک" دئییب.
حادثه ایله علاقه‌دار سوروشدورمانین داوام ائتدیگی بیلدیریلیب.
