گونئی آذربایجان تورک‌لرینه قارشی ایکینجی تحقیر و یئنه اوشاق‌لار
بابک موغانلی و ایبراهیم ساوالان "فیتیله" پروقرامی ایله ایلگیلی دانیشیر
اؤتن جمعه، نوامبرین 6سی ایرانین ایکینجی دؤولت کانالیندا یاییم‌لانان “فیتیله” اوشاق وئریلیشی آذربایجان‌لی‌لاری تحقیر ائدن بیر صحنه‌جیکله یاددا قالیب. صحنه‌جیکده فارسجا یاخشی دانیشان بیر مهمان‌خانا صاحیبی و مهمان‌خانادا یاشایان آذربایجان‌لی آتا ایله آزیاش‌لی اوغلونون دیالوقو وئریلیب. آزیاش‌لی اوشاق توالت فیرچاسی ایله دیش فیرچاسینی سهو سالیر و نتیجه‌ده دیشینی فیرچالادیق‌دان سونرا مهمانخا‌دان پیس قوخو گلمه‌یه باشلاییر. قوخونون اوشاق‌دان گلدیگینی آیدین‌لاش‌دیران آتا اوغلونا گؤره مهمان‌خانا صاحیبین‌دن عذر ایسته‌ییر.
وئریلیش‌دن سونرا ایرانین آذربایجان‌لی‌لار یاشایان تبریز، خوی، ماراغا، اردبیل، اورمیا، زنجان و تهران شهرلرینده بؤیوک میقیاس‌لی اعتیراضلار باشلانیب. اتیراضلار “هارای، هارای من تورکم”، “عرقچی‌لییه سون قویون”، “آذربایجان میلتی چکممز بو ذیللتی” شعارلاری ایله گئچیریلیب.
خاطیرلاداق کی، بون‌دان اؤنجه 2006.جی ایلده ایراندا چاپ اولونان “ایران” آدلی قزئتین اوشاق صحیفه‌سینده آذربایجان‌لی‌لارین حشره‌یه بنزدیلدیگی بیر کاریکاتور چئکیلمیشدی. همین کاریکاتورا اعتیراض اولا‌راق اون مین‌لرله آذربایجان‌لی کوچه‌لر چیخمیش، یوزلرله میللی فعال حبس اولونموشدو.
حادثه ایله باغلی سایتیمیزا دانیشان دونیا آذربایجان‌لی‌لاری کونقره‌سی‌نین گونئی آذربایجان نوماینده‌لیگی‌نین رهبری بابک موغانلی دئییب کی:
“ایرانین ایکینجی کانا‌لی ایله یاییم‌لانان معلوم وئریلیش اوشاق‌لار اوچون اولسا دا، ایران بویو بؤیوک‌لر ده بو وئریلیشی ایزلییر. بیر آذربایجان‌لی اوشاغی توالت فیرچاسییلا دیش فیرچاسی آراسین‌داکی فرقی آنلامایا‌جاق قدر گئریدوشونجه‌لی فورمادا تصویر ائتمک، سونرا اونو، مکتبده همین اوشاقلا بیرلیکده اوخویان فارس، کورد، بلوچ اوشاق‌لاری‌نین لاغ اوبیکتی اولماسینا آپاریب چیخارا‌جاق”.
همچینین بابک موغانلی باش وئرن‌لرله باغلی ایران پارلامنتینده اولان آذربایجان‌لی دپوتات‌لارین و آذربایجان‌لی‌لارین یاشادیغی شهرلرده حاکیم‌لرین اعتیراضلاری‌نین یئترسیز اولدوغونو سؤیله‌ییب:
“بو حادثه ایله باغلی تبریزین، اورمیانین، اردبیلین و س. دپوتات‌لاری، ویلایت رهبرلری اعتیراضلارینی بیلدیردی‌لر، آمما اونلارین اعتیراضلاریندا آنجاق بو دئییلیردی کی، “بیز فارس‌لارلا وحدتدییک، بیز ایکی خالق آراسیندا موناقیشه ایستمیریک”. بیرجه آذربایجان‌لی دپوتات دا دئمه‌دی کی، بیز خالقلا بیرلیکده دینج آکسیایا چیخیریق. خاطیرلادیم کی، ایراندا فارس‌لار طرفین‌دن آذربایجان‌لی‌لارا قارشی بو جور تحقیر حال‌لاری بیرینجی دفعه دئییل، یادینیزدا‌دیرسا، 2006.جی ایلده بیر ایران قزئتی آذربایجان‌لی‌لاری حشره‌یه بنزه‌دن کاریکاتور یایینلامیشدی و بو، چوخ بؤیوک اعتیراضلارا سبب اولموشدو. او حادثه‌دن بری ایران حؤکومتی چوخ احتیاط‌لی ایدی، بئله بیر سهوه یول وئرمزدی ده، آنجاق گؤردوک کی، فارس شووینیزمی یئنه دینج دایانمادی.
قریبه‌سی اودور کی، تورک‌لرین تحقیر اولوندوغو همین اوشاق وئریلیشینده اوینایان هر اوچ آکتیورون اؤزلری ده تورک‌لردیر. بیری تبریزلی، دیگرلری زنجان‌لی‌دیرلار. ایرانین دینی لیدئری خامنه‌ای اؤزو ده تورک‌دور و وئریلیش هر شئی‌دن اؤنجه او اوچ آذربایجان‌لی‌نین اؤزونه، دینی لیدئر خامنه‌ای‌یه قارشی تحقیردیر. خامنه‌ای اؤزو بونا اعتیراض ائتملیدی”، دئیه بابک موغانلی سایتیمیزا بیلدیریر.
ایراندا یاشایان آذربایجان‌لی شاعر و میللی-مدنی فعالیتینه گؤره دفه‌لرله حبسده اولموش فعال ایبراهیم ساوالان‌سا دئییر کی، باش وئرمیش بو حادثه‌نین ان ایرنج طرفی آیری‌سئچکیلیگین اوشاق‌لار واسیطه‌سیله آپاریلماسی‌دیر:
“ایران کانالیندا یاییم‌لانان بو اوشاق وئریلیشی اوولکی وئریلیش‌لردن فرق‌لی اولا‌راق تورکجه یاییملانیردی. بیز ایندییه قدر ایرانین دؤولت کانالیندا تورکجه وئریلیشله قارشیلاشمامیشدیق و وئریلیش باشلایاندا اونون آرخاسیندا بیر حیله دایاندیغینی درحال حس ائتمیشدیک. وئریلیشین سونوندا آرتیق مقصدین تورک‌لری مدنیت‌سیز و هئچ نه‌یی باشا دوشمه‌ین اینسان‌لار کیمی گؤسترمک اولدوغونو آنلادیق. دوشونورم کی، بو، ایرانین 100 ایللیک میللتچی سیاستی‌نین نؤوبتی تظاهورو ایدی، تورک اوشاق‌لاری اؤزگوون و قوروردان محروم ائتمک بو سیاستده زامان زامان اورتایا چیخیر. تاسوف کی، اونلار اوشاق دونیاسینی بو جور زده‌لمه‌یین نئجه بؤیوک خطا‌لارا یول آچاجاغینی هئچ دوشونمه‌ییب‌لر ده”، دئیه ایبراهیم ساوالان وورغولاییر.
ایبراهیم ساوالان بو تحقیر نتیجه‌سینده ایرانین آذربایجان‌لی‌لار یاشایان بوتون شهرلرینده بؤیوک اعتیراضلارلارین باشلاندیغینی دئییر. او، باش وئرن‌لره گؤره ایران تلویزیونونون عذر ایستمه‌سی و وئریلیشین باغلانماسینی دا یئترلی سایمیر:
“ 2006.جی ایلده بیر ایران قزئتینده آذربایجان‌لی‌لارا قارشی چئکیلمیش کاریکاتورون مؤلفی‌نین ده حبس اولونماسی‌نین طرفداری اولمامیشیق، ایندی ده معلوم اوشاق وئریلیشی‌نین یارادیجی‌لاری‌نین جزالاندیریلماسی‌نین طرفداری دئیی‌لیک، چونکو بئله شئی‌لر ایرانین دؤولت سیاستین‌دن ایره‌لی گلیر و تکرار تکرار باش وئره‌جک. بیز ایستردیک کی، ایران دؤولتی اؤزونون فارس مرکزچی سیاستینی دییشدیرسین، ایران آنایاساسی‌نین بیزه تانیدیغی میلی حاق‌لاریمیزی محدودلاش‌دیرماق‌دان ال چئکسین”.
"خبر 365 سیته‌سیندن آلینمیشدیر"
