ایلک دفعه بیر قادینین ایدزدن قورتولدوغو ادعا ائدیلیر

ایلک دفعه بیر قادینین، آلدیغی معالیجه‌نین آردین‌دان، (قازانیلمیش باغیشیقلیق یئترسیز‌لیگی سندرومو) ایدز خسته‌لیگینه یول آچان (انسان باغیشیقلیق یئتمزلیگی ویروسو) اچ‌آی‌وی ویروسون‌دان قورتولدوغونا اینانیلیر.

بی‌بی‌سی‌ده یئر آلان خبره گؤره، آمریکالی قادین خسته ایدزه سبب اولان اچ‌آی‌وی ویروسونا قارشی طبیعی دیرنجی اولان بیریندن کؤک حجره آلدی.

بو سیرادا لوسمی معالیجه‌سی گؤره‌ن قادینین ۱۴ آیدیر اچ‌آی‌وی ویروسون‌دان آرینمیش دورومدا اولدوغو قید ائدیلدی.

خسته‌نین، اچ‌آی‌وی ویروسون‌دان قورتولان اوچونجو انسان و ایلک قادین اولدوغونا اینانیلیر.

آنجاق متخصصلر، گؤبک باغی قانینی احتیوا ائد‌ن حجره جالاغی یولونون، اچ‌آی‌وی داشییان چوخو اینسان اوچون اویغون اولابیلمه‌یه‌جک قدر ریسکلی اولدوغونا ایشاره ائدیر.

ویروس‌دان آرینان خسته‌نین بو نمونه اولقوسو دنور شهرینده بیر طب کنفرانسیندا سونولدو و بئله‌جه بو اصولون اچ‌آی‌وی اوچون بیر معالیجه اولاراق ایستیفاده ائدیلدیگی ایلک دفعه اورتایا چیخدی.

خسته، سرطان معالیجه‌سینین بیر پارچاسی اولاراق گؤبک باغی قانی جالاغی آلدی و او زاماندان بو یانا اچ‌آی‌وی معالیجه‌سی اوچون لازیم اولان آنتی‌رتروویرال درمانلارا احتیاج دویمادی.

اولقو، سرطان و جدی خسته‌لیکلری معالیجه ائتمک اوچون عینی تیپ قان جالاغی آلمیش اچ‌آی‌وی داشییان اینسانلار اوزرینه آمریکا بیرلشمیش دؤولتلرینده ائدیله‌ن گئنیش بیر آراشدیرمانین پارچاسی ایدی.