تورکیه‌ده‌کی یانغینا ۶ اؤلکه‌دن هاوا دستگی
"بو یاردیم ایسته‌کلرینی رد ائتمک دیپلوماتیک اولاراق دوغرو دئییل"
جولای آیینین ۲۸یندن بری تورکیه‌نین گونئی بؤلگه‌لرینده‌کی اورمان یانغینلاری ایله مبارزه آپارماق اوچون ۶ اؤلکه‌دن هاوا دستگی گلدی. اورمان‌چی‌لیق باش مودور کؤمک‌چی‌سی مصطفی اؤزکایا، تورکیه‌یه عاید ۴۵ هلیکوپتر و ۳ اوچاغین یانین‌دا خاریجی اؤلکه‌لردن ده دستک آلدیقلارینی و هله ده گؤزلدیکلری یاردیم اوچاق‌لارینین اولدوغونو سؤیله‌دی.
حاضردا اؤلکه‌ده اولان ۱۸ خاریجی هاوا آراجینین ۱۲ اوچاق و ۶ هلیکوپتردن عبارت اولدوغونو ایفاده ائد‌ن اؤزکایا، اوچاق‌لاردن ۱۰ونون و بوتون هلیکوپترلرین قارشیلیقسیز گؤندریلدیگینی بیلدیردی.
تورکییه‌نین تاریم و اورمان باخانلیغی، خاریجی ایشلر باخانلیغی و یا آفاد (آفت و عاجل دوروم یؤنتیمی باشقانلیغی) واسطه‌سی ایله هئچ بیر اولوسلارآراسی یاردیم چاغریسی ائتمه‌دیگینی ایضاح ائد‌ن اؤزکایا، "ایران ۱ اوچاق و ۲ هلیکوپترله دستک وئردی. آذربایجان ۱ هلیکوپتر و ۵۳ آراجلیق بیر اکیپ ایله یانغین بؤلگه‌سینه چاتماق اوزره‌دیر. اوکراینا ۳ اوچاق ایله دستک وئردی. ۵ اوچاق و ۳ هلیکوپتر روسیادان گلدی" دئدی.
آوروپا بیرلیگین‌ده‌کی "مولکی مدافعه مکانیزمی"نه ایشاره ائد‌ن اؤزکایا بونون آوروپا بیرلیگینه عضو اؤلکه‌لرین حاق اؤد‌مکله یاراتدیقلاری بیر مکانیزم اولدوغونو ایضاح ائتدی. آفادین دا بورادا بیر عضو اولدوغونو وورغولایان اؤزکایا، "بورادا احتیاجی اولان اؤلکه‌لره دستک وئریلیر. بو یاردیم دئییل. بیز اؤز حاقلاریمیزدان لازیم اولدوقدا ایستیفاده ائدیریک. بیز بونو یاردیم آدلاندیرمیریق. دستک‌دیر، چونکو حاق‌لی اولاراق بیزیم اولانی ایسته‌ییریک" دئدی.
کروواسی، ایسپانیا، فرانسا و رومانیدن ۵ اوچاق اوچون تکلیف آلدیقلارینی سؤیله‌یه‌ن اؤزکایا، رومانی و فرانسانین اوچاق‌لارینین اویغون اولمادیقلاری اوچون گلمدیگینی، کروواسیدن ۱، ایسپاییادان ایسه ۲ اوچاق گلدیگینی سؤیله‌دی.
تورکیه‌نین هاوا گوجونون یاخشی اولدوغونو، آنجاق بو جور دستک وئرمک ایسته‌یه‌ن اؤلکه‌لری گئری چئویره‌بیلمه‌یه‌جکلرینی ایفاده ائد‌ن اؤزکایا، "بو یاردیم ایسته‌کلرینی رد ائتمک دیپلوماتیک اولاراق دوغرو دئییل" دئدی.
