تورکیه‌ده نفت و طبیعی گاز استحصالیندا رکورد
"اکتبر آییندا نفت و طبیعی گاز استحصالیمیز هم آیلیق هم ده گونلوک اولاراق یئنی ذیروه‌لره چاتدی"
انرژی و طبیعی قایناقلار ناظیری آلپ آرسلان بایراکتار، اکتبر آییندا نفت و طبیعی گاز استحصالیندا آیلیق و گونلوک اولاراق رکوردا ایمضا آتدیقلارینی بیلدیردی.
ناظیرلیکدن وئریله‌ن یازیلی شرحه گؤره، خام نفت و طبیعی گاز استحصالیندا اکتبردا یئنی رکوردلار قیریلدی.
شرحده فیکیرلرینه یئر وئریله‌ن ناظیر بایراکتار، "اکتبر آییندا نفت و طبیعی گاز استحصالیمیز هم آیلیق هم ده گونلوک اولاراق یئنی ذیروه‌لره چاتدی. خام نفت استحصالیندا ۳ میلیون ۳۶۱ مین ۷۲۵ بوشقا، طبیعی گاز استحصالیندا ایسه ۲۳۴ میلیون ۳۸۴ مین ۱۷ مکعب متر ایله بوتون زامانلارین ان یوکسک رقملرینه چاتدیق" ایفاده‌لریندن ایستیفاده ائتدی.
تورکیه‌نین بؤیودوگونون، اهالیسینین آرتدیغینین و احتیاجلارینین چوخالدیغینین وورغولایان بایراکتار، بونلاری قئید ائتدی:
"یئنی ساحه‌لرده، یئنی آختاریشلارلا، یئنی قازمالارلا هم نفت‌ده هم ده طبیعی گازدا استحصالیمیزی آرتیراجاغیق. سومالی‌ده سیسمیک فعالیتلرینه باشلایان اوروج رئیس نومونه‌سینده اولدوغو کیمی فرقلی قاره‌لرده یئنی رزرولر، یئنی کشفلر اوچون سعی گؤسترجییک. هدفیمیز، انرژیده تام موستقیل تورکیه".
گونلوک اورتالاما نفت استحصالیندا اکتبردا ۱۰۸ مین ۴۴۳ بوشقا، طبیعی گاز استحصالیندا ایسه ۷ میلیون ۵۶۸ مین ۲۴۲ مکعب مترله ان یوکسک سویه‌لره چاتیلدی.
