"ایمام باییلدی" نئجه پیشیریلیر؟

تورک مطبخینده ان چوخ ایستیفاده ائدیلن ماتریال‌لاردان بیری بادیمجان‌دیر. آنا وطنی هیندیستان اولان بو بنؤوشه تروز، تورک مطبخینه سونرا‌دان گیرمیش اولسا دا هر زامان خصوصی بیر یئره مالیک اولموشدور. تورک مطبخینده بادیمجان‌لا پیشیریلن یوزلرله تعریف اولدوغونو سؤیلسک، هئچ ده سهو اولماز. سالاددان کبابا، تورشودان دولمایا قدر بیر چوخ یئمگین اساس ماتریالی بادیمجان‌دیر. تخمین ائدجگینیز کیمی، بو گون سیزلرله بادیمجان‌لا پیشیریلن بیر یئمک تعریفی پایلاشاجاییق. سویوق اولا‌راق یئییلن و اتسیز اولا‌راق بیشیریلن یئمگیمیزین آدی؛ "ایمام باییلدی". خصوصیله ایستی یای گون‌لرینده اوستونلوک وئریلن، وجتریئنلرین و وئگان‌لارین دا راحت‌لیقلا یئیه‌جگی بیر یئمک‌دیر. آدی دا اولدوقجا ماراق‌لی؛ "ایمام باییلدی" آدی‌نین هارا‌دان گلدیگی ایله باغلی بیر چوخ روایت وار. بونلاردان ان تانینان حیکایه‌، بو یئمگی یئین ایمامین یئمگی چوخ سئویب، لذتین‌دن هوشونو ایتیردیگی شکلینده...

ایندی نؤوبه گلیب "ایمام باییلدی" یئمگینی پیشیرمه‌یه... اوّل ماتریال‌لاریمیزی سایاق؛

4  دنه بادیمجان

2  سو ایستکانی زیتون یاغی

2  باش اورتا بوی سوغان

12  دیش ساریمساق

3  عدد آجی بیبئر

3  عدد بامادو

3  چیمدیک دوز

3 چیمدیک ایستوت

1  دولو شیرین قاشیغی شکر توزو

½  دسته جعفری

1  یئمک قاشیغی زیتون یاغی

اوّلجه بادیمجان‌لاری یویوب ساپیندان آشاغیا دوغرو آلابزک سویون. سویولموش بادیمجان‌لاری یاخشیجا قیزدیریلمیش زیتون یاغیندا بوتون اولا‌راق یوموشایانا قدر قیزاردین. هامیسینی قیزارددیقدان سونرا آرتیق یاغینی اممه‌سی اوچون کاغیذ دسمالین اوزرینه آلین.

سوغان‌لاری یاریم حلقه شکلینده، ساریمساق و بیبرلری ایسه خیردا اولا‌جاق شکیلده دوغرایین. هامیسینی 1 یئمک قاشیغی زیتون یاغی ایله بیرلیکده تاوادا یوموشایانا قدر بیر نئچه دقیقه پیشیرین. اوزرینه قابیق‌لاری سویولموش، چکیردک‌لری چیخاریلمیش و دوغرانمیش بامادورلاری علاوه ائدین. بامادورلار یومشالیب پیشدیغی زامان دوز، قارا بیبر، شکر و جعفری علاوه ائدیب اودو سؤندورون.

بادیمجان‌لاری قازانا دوزون. اورتا‌لارینی، بیچاق کؤمگی ایله خط شکلینده آچین، قاشیقلا گئنیشلندیریب بیر قاییق کیمی آچین. ایچلرینه بامادور ماتریا‌لی دولدورون. تاوادا قالان بامادورلو سویو دا قازانین دیبینه تؤکون. اوستونه چوخ آز زیتون یاغی گزدیرین. قاپاغی اؤرتولو اولا‌راق 20-25 دقیقه پیشیرین. پیشن ایمام باییلدینی اوتاق درجه‌سینده و یا سویوق اولا‌راق سرویس ائدین. عافیت اولسون.