آوراسیا جمهوریتلرینده گئچن هفته
ایستانبول شهرینده تورک دؤولتلر تشکیلاتی صنایع، علم، تکنولوژی و یئنیلیکچیلیک ناظیرلری ۱.جی ییغینجاغی گئرچکلشدیریلدی
۲۰ اکتبر ۲۰۲۴ تاریخینده مولداوی‌ده جمهورباشقانلیغی سئچکیسی و آوروپا بیرلیگینه ایشتیراک اوچون آنایاسا دییشیکلیگی رفراندومو گئرچکلشدیریلدی. جمهورباشقانلیغی یاریشیندا مؤوجود جمهورباشقانی مایا ساندی سسلرین یوزده ۳۴.۱۲سینی، اسکی ساوچی آلکساندرو ایستویانوگلو یوزده ۳۰.۹ونو آلدی. سئچکیلرین ۲.جی دؤورو ۳ نوامبر ۲۰۲۴ تاریخینده گئرچکلشدیریله‌جک. آوروپا بیرلیگینه ایشتیراک اوچون آنایاسا دییشیکلیگی رئراندومو نتیجه‌لرینه گؤره سئچیجیلرین یوزده ۵۰.۰۷سی هه، یوزده ۴۹.۹۳و یوخ اویو وئردی.
۲۱ اکتبر ۲۰۲۴ تاریخینده قازاقیستان جمهورباشقانی قاسیم جومرد توکایئو چک جمهوریتی خاریجی ایشلر ناظیری ژان لیپاوسکی‌نی قبول ائتدی. قبولدا قازاقیستانین چکیا و آوروپا بیرلیگی ایله علاقه‌لری مؤوضوعلاری اله آلیندی.
۲۲-۲۴ اکتبر ۲۰۲۴ تاریخلرینده قازان شهرینده ۱۶.جی بریکس ذیروه‌سی گئرچکلشدیریلدی. ذیروه‌ده دار و گئنیشلدیلمیش (بریکس+) ایجلاسلار ائدیلدی. "عدالتلی قلوبال اینکیشاف و تهلوکه‌سیزلیک اوچون چوخ طرفلیلیگین گوجلندیریلمه‌سی" باشلیغی آلتیندا گئرچکلشدیریلن ذیروه‌یه آذربایجان، بلاروس، بیرلشمیش عرب امرلیکلری، بولیوی، بوسنی و هرزگوین، چین، جنوبی آفریقا، هیندیستان، فیلیسطین، ایران، قازاقیستان، قیرقیزیستان، کونگو، لائوس، موریتانیا، مصر، اؤزبکیستان، روسیا فدراسییونو، تاجیکیستان، تورکمنیستان، تورکیه و ونزوئلا جمهورباشقانلاری، هیندیستان، ارمنیستان، اتیوپی و ویتنام باش ناظیرلری ایشتیراک ائتدی. آیریجا بحرین، بنگلادش، برزیل، اندونزی، کوبا، نیکاراگوئه، سریلانکا و تایلند خاریجی ایشلر ناظیرلری، بیرلشمیش میللتلر عمومی کاتیبی، آفریقا بیرلیگی باشقانی کیمی بین الخالق قورولوشلارین عمومی کاتیبلری، جمعده ۳۶ اؤلکه‌دن نماینده‌لر قاتیلدی. ذیروه‌ده بین الخالق بحرانلار، چوخ قوطبلو دونیا، اقتصادی امکداشلیق، بریکس دیجیتال اؤده‌مه سیستمی کیمی موختلیف مؤوضوعلار اله آلیندی. ذیروه سونوندا بریکس قازان بیاننامه‌سی ایمضالاندی. ذیروه چرچیوه‌سینده چوخ ساییدا ایکیلی گؤروشمه‌لر گئرچکلشدیریلدی. روسیا دؤولت باشقانی کؤمکچیسی یوری اوشاکوو ۱۳ اؤلکه‌نین بریکسه عضو اولماق ایسته‌دیگینی بیلدیردی.
بریکس ذیروه‌سی چرچیوه‌سینده تاتاریستان رئیسی روستم میننه‌خانوو آذربایجان، اؤزبکیستان و تورکمنیستان جمهورباشقانلاری ایله گؤروشمه‌لر ائتدی. جمهورباشقانی میننه‌خانوو، ایکیلی علاقه‌لرین اینکیشاف ائتدیریلمه‌سینه وئردیگی قاتقیلاردان اؤترو جمهورباشقانلاری ایلهام علییئو، شؤوکت میرضیایئو و سردار بردی‌محمدووا دوستلوق مدالی تقدیم ائتدی.
۲۲ اکتبر ۲۰۲۴ تاریخینده سمرقند شهرینده قازاقیستان و اؤزبکیستان باش ناظیرلرینین ایشتیراکی ایله ۴.جو سرحد اؤته‌سی فورومو تشکیل ائدیلدی. فوروم‌ا قازاقیستان و اؤزبکیستان سرحدینده گؤمروکسوز تیجارت ساحه‌سینین فعالیته گئچیریله‌جگی آچیقلاندی. طرفلر اورتاق تیجارت حجمینی ۱۰ میلیارد دلارا چیخارماغی هدفله‌ییرلر.
۲۳ اکتبر ۲۰۲۴ تاریخینده آذربایجان مدافعه ناظیری ذاکیر حسنوو قیرقیزیستانا رسمی سفر گئرچکلشدیردی. ناظیر حسنوو بیشکئک شهرینده قونومداشی باکتی‌بک بکبولوتوو ایله گؤروشدو. گؤروشمه سونوندا ایکی اؤلکه ناظیرلیکلری آراسیندا ۲۰۲۵.جی ایله دایر عسگری امکداشلیق پلانی ایمضالاندی.
***
۲۶ سپتامبر ۲۰۲۴ تاریخینده ایستانبول شهرینده تورک دؤولتلر تشکیلاتی صنایع، علم، تکنولوژی و یئنیلیکچیلیک ناظیرلری ۱.جی ییغینجاغی گئرچکلشدیریلدی. ییغینجاغا آذربایجان، قازاقیستان، قیرقیزیستان، شیمالی قیبریس تورک جمهوریتی، ماجاریستان، اؤزبکیستان و تورکیه‌دن ناظیرلر قاتیلدی. ییغینجاق سونوندا بیاننامه ایمضالاندی. بیر سونراکی ییغینجاغین باکی شهرینده ائدیله‌جگی آچیقلاندی.
ایلگیلی‌لی خبرلر
تورک جمهوریتلرینده کئچن هفته
تورک جمهوریتلری آراسینداکی امکداشلیغی گوجلندیره‌ن فعالیتلر سرعت کسمه‌دن داوام ائدی
