"زیتون یاغلی بیبر دولماسی" نئجه پیشیریلیر؟

تورک مطبخینده "زیتون یاغلی" آدی ایله تصنیف ائدیلن یئمک‌لر سویوق یئییلن، اتسیز پیشیریلن و زیتون یاغی ایستیفاده ائدیله‌رک حاضرلانان یئمک‌لردیر. اکثریتله ده تاماملاییجی یئمک و یا چرز کیمی ایشلدیلیرلر. بیبر دولماسی دا او یئمک‌لردن بیر دنه‌سی‌دیر.

زیتون یاغلی بیبر دولماسی پیشیرمک اوچون لازیم اولانلار:

16  عدد کیچیک دولما‌لیق بیبر

1 ½  سو ایستکانی زیتون یاغی

4  دنه خیردا دوغرانمیش سوغان

2  سو ایستکانی دویو

2  یئمک قاشیغی چام فیستیغی

12  یئمک قاشیغی قوش اوزومو

  دوز

½  شیرین قاشیغی قار بیبر

1  شیرین قاشیغی قورو نعناع

1  شیرین قاشیغی یئنی باهار (فلفل فرنگی)

1  یئمک قاشیغی شکر

2  سو ایستکانی سو

3 - 4  عدد بامادور - دولمانین اوستونو اؤرتمک اوچون

زامان گلدی بیبر دولماسینی پیشیرمه‌یه؛

1  سو ایستکانی زیتون یاغینی بیر قازانا آلین و سوغان‌لاری قووورون. دویولری نیشاستاسی گئدنه قدر یویون. سوغان‌لاری پیشیردیک‌دن سونرا دویو علاوه ائدین و قووورمایا داوام ائدین. سونرا دوز، بیبر، قوش اوزومو، نعناع و شکر علاوه ائدیب یاخشیجا قاریشدیرین. ایکی ایستکان سو علاوه ائده‌رک دویولری دیریجه بیشیرین. بیشن دویو ایلیانا قدر گؤزله‌یین. سونرا ایچینه یئنی باهاری علاوه ائدیب، قاریشدیرین. دادینا باخین؛ دوز و شکر آز گلیبسه علاوه ائدین.

دولما‌لیق بیبرلرین ساپ‌لارینی کسین و ایچ توخوم‌لارینی چیخارین. حاضیرلادیغینیز دویونو بیبرلرین ایچلرینه دولدورون. بامادورلاری قالین اولا‌جاق شکیلده دوغرایین و سالدیغینیز بیبرلرین آغیز قیسیم‌لرینه دویولر کنارا داشمایا‌جاق شکیلده یئرلشدیرین. حاضیرلادیغینیز بیبرلری درین بیر قازانا یئرلش‌دیرین. اوزرینده قالان یاریم ایستکان زیتون یاغینی تؤکون و دولما‌لارین یاری‌سینا گله‌جک قدر سو علاوه ائدیب، اورتا حرارت‌لی آتشده 30 دقیقه پیشیرین. دولما‌لار سویودوق‌دان سونرا اوتاق ایستیلیغینده سرویس ائدین. عافیت اولسون.