گئچن هفته تورک جمهوریتلرینده نهلر یاشاندی
گئچهن هفته آذربایجانلی عسگرلر قازاقیستانین جنوب-شرقینده اولان کؤکتال آتیش میدانیندا قازاقیستانلی عسگرلر ایله بیرلیکده اورتاق عسگری مانور تشکیل ائتدی
۲۲-۲۳ آگوست ۲۰۲۴ تاریخلرینده تاتاریستانین پایتاختی قازان شهرینده ۳.جو قازان گلوبال گنجلیک ذیروهسی تشکیل ائدیلدی. ذیروهیه ۴۰ اؤلکهدن نمایندهلر، تاتاریستان جمهوریتی رئیسی روستم مینهخانوو قاتیلدی.
۲۲-۲۳ آگوست ۲۰۲۴ تاریخلرینده قازاقیستان جمهورباشقانی قاسیم جومرد توکایئو تاجیکیستانا دؤولت سفری گئرچکلشدیردی. قازاقیستان جمهورباشقانی توکایئو دوشنبهده تاجیکیستان جمهورباشقانی امامعلی رحمان، باش ناظیر قاهیر طاهرزاده، مجلیس باشقانی محمدطاهر زامیرزاده ایله گؤروشمهلر ائتدی. توکایئو-رحمان گؤروشمهسیندن سونرا ایکی اؤلکه آراسیندا ۱۶ آنلاشما ایمضالاندی. بونلار آراسیندا قازاقیستان-تاجیکیستان متفیقلیک آنلاشماسی دا وار. سفر چرچیوهسینده تاجیکیستان-قازاقیستان ایش فورومو ائدیلدی. ایش فوروموندا ۱ میلیارد دلارلیق آنلاشمالار ایمضالاندی. جمهور باشقانلاری قازاقیستان مدنیت گونلرینین آچیلیش مراسیمینده ایشتیراک ائتدیلر.
۲۲-۲۳ آگوست ۲۰۲۴ تاریخلرینده آذربایجان جمهورباشقانی ایلهام علییئو اؤزبکیستانا دؤولت سفری گئرچکلشدیردی. داشکند شهرینده جمهورباشقانلاری باشقانلیغیندا ایلک اؤزبکیستان-آذربایجان دؤولتلرآراسی یوکسک شورا ییغینجاغی گئرچکلشدیریلدی. ییغینجاق سونوندا طرفلر آراسیندا ۱۷ آنلاشما ایمضالاندی. اؤزبکیستان و آذربایجان علاقهلری رسمی اولاراق متفیقلیک سوییهسینه یوکسلدیلدی. سفر چرچیوهسینده کوکاند شهرینده اؤزبکیستان-آذربایجان بؤلگهلرآراسی فورومو، داشکند شهرینده اؤزبکیستان-آذربایجان ایش فورومو تشکیل ائدیلدی. اؤزبکیستان-آذربایجان ایش فوروموندا طرفلر آراسیندا ۲ میلیارد دلارلیق آنلاشمالار ایمضالاندی. جمهورباشقانلاری ایکی اؤلکهنین قاباقدا گلن ایش اینسانلاری ایله گؤروشدولر و اورتاق فروخ ذاکیروو و آذربایجاندان پولاد بولبولاوغلو ایکی اؤلکهنین خالق صنعتچیسی موکافاتینا لاییق گؤرولدولر.
گئچهن هفته آذربایجانلی عسگرلر قازاقیستانین جنوب-شرقینده اولان کؤکتال آتیش میدانیندا قازاقیستانلی عسگرلر ایله بیرلیکده اورتاق عسگری مانور تشکیل ائتدی. ایکی اؤلکه عسگرلری گئچهن جولای آییندا تشکیل ائدیلهن "بیرلشدیک-۲۰۲۴" عسگری مانوروندا دا بیر آرایا گلمیشدی. گئچهن هفته تورک سلاحلی قوتلریندن متخصصلر قازاقیستان اوردوسونون اؤزل حرکات قوتلرینه ۳ آیلیق تعلیم وئرمک و تجروبهلرینی پایلاشماق اوچون قازاقیستانا گئتدیلر.
***
۱۸-۱۹ آگوست ۲۰۲۴ تاریخلرینده روسییا فدراسیونو دؤولت باشقانی ولادیمیر پوتین آذربایجانا دؤولت سفری گئرچکلشدیردی. باکیدا گئرچکلشدیریلن علییئو-پوتین گؤروشمهسیندن سونرا طرفلر آراسیندا ۷ آنلاشما ایمضالاندی. طرفلر باکیدا اورتاق اونیوئرسیته آچما، اورتاق نفت تانکرلری قاییرما مؤوضوعلاریندا راضیلیق الده ائتدیلر. روسیا دؤولت باشقانی ان سون ۲۰۱۸-جی ایلده آذربایجانا سفر گئرچکلشدیرمیشدی.
روسیا فدراسیونو دؤولت باشقانی ولادیمیر پوتین آذربایجاندان سونرا شیمالی قافقازداکی کاباردینو-بالکاریا، اوستیا-آلانیا و چئنیستان جمهوریتلرینه سفر ائتدی. غربین تطبیق ائتدیگی تحریملردن سونرا روسیا باخیمیندان بؤلگهنین، قافقازدان گئچهن بین الخالق جنوب-شیمال نقلیات کوریدورونون و غرب ایله شرقی باغلایان اورتا کوریدورون اهمیتی داها دا آرتدی.
۲۰ آگوست ۲۰۲۴ تاریخینده آذربایجان خاریجی ایشلر ناظیرلیگی مطبوعات سؤزچویو آیخان حاجییئو اؤلکهسینین بریکسه قاتیلماق اوچون رسمی اولاراق مراجعت ائتدیگینی آچیقلادی. مراجعتین ولادیمیر پوتینین باکی سفریندن همن سونرا ائدیلمهسی دقتلردن قاچمادی. گئچهن آی آستانادا گئرچکلشدیریلن شانگهای امکداشلیق تشکیلاتی ذیروهسینده چین خالق جمهوریتینین آذربایجانین بریکسه عضولوگونو دستکلهدیگی آچیقلانمیشدی.
