"هئیوا تاتلیسی" نئجه پیشیریلیر؟
میوهدن حاضیرلانان شیرینیلر هر مؤوسوم یئییلهبیلیر
تورکیهده یئمکلردن سونوندا یئییلن "شیرینی"لرین تورک مطبخینده یئری باشقادیر. تورک شیرینیسی دئیینجه هر کسین آغلینا باقلاوا گلسه ده تورکیهده آنا مادهسی سود و یا میوه اولان شیرینیلر ده گئنیش اولاراق پیشیریلیر. سویوق اولاراق سئویلن سودلو شیرینیلر، یونگول اولدوقلاری اوچون ایستی هاوالاردا ترجیح ائدیلیر. میوهدن حاضیرلانان شیرینیلر ایسه هر مؤوسوم یئییلهبیلیر. آنجاق شیرینیسی دوزلدیلن میوه مؤوسومه گؤره دییشیکلیک گؤستریر. قیشدا؛ داها چوخ هئیوا، آلما، آرمود کیمی میوهلر و بالقاباغی ایستیفاده ائدیلرکن یاز آیلاریندا، شفتالی، اریک، انجیر کیمی میوهلر ایستیفاده ائدیلیر. بوگون بیر میوه شیرینیسی اولان "هئیوا تاتلیسی" تعریفی وئرجهییک.
هئیوا شیرینیسی پیشیرمک اوچون لازیم اولانلار:
3 عدد هئیوا
1/2 ایستکان شکر
1 عدد چوبوق دارچین
5 عدد قرهنفیل
1 عدد لیمون
1 ½ ایستکان سو
3 قاشیق قایماق
زامان گلدی هئیوا شیرینیسینی پیشیرمهیه؛
ایلک اولاراق درینجه بیر قابا سو دولدورون و ایچریسینه لیمونو سیخین. هئیوالاری ایکییه بؤلهرک قابیقلارینی سویون. چیخاردیغینیز چکیردکلری آیری بیر قابدا ساخلایین، پیشیرمه زامانی شیرینییه رنگ وئرمهسی اوچون ایستیفاده ائدجکسینیز.
سویدوغونوز هئیوالارین قارارمامالاری اوچون، هامیسی حاضیر اولانا قدر لیمونلو سودا ساخلایین. بوتون هئیوالار حاضیر اولاندا اورتا بؤلوملری اوستده قالاجاق شکیلده قازانا یئرلشدیرین. چوبوق دارچینی، قرهنفیللری و هئیوا توخوملارینین هامیسینی قازانا علاوه ائدین. هئیوالارین هر بیرینین اوستونه شکر قویون. سویو دا قازانا علاوه ائتدیکدن سونرا قازانین قاپاغینی باغلایاراق سو قاینایانا قدر اورتا آتشده، سونرا دا ضعیف اوددا 1-1.5 ساعتا قدر هئیوالار یوموشایانا قدر پیشیرین. پیشن هئیوا بوشقابا آلین و سویوماسی اوچون گؤزلدین. سویویان هئیوالارین اوستونه اوّل بیر قاشیق هئیوانین پیشدیگی سودان تؤکون، سونرا دا ½ قاشیق قایماق قویاراق سرویس ائدین. عافیت اولسون!
