"کیسیر" نئجه پیشیریلیر؟

بوغدا و یارمادان حاضیرلانمیش محصول‌لار تورک مطبخینده چوخ ایستیفاده ائدیلیر. آنادولو توپراق‌لاری‌نین و جغرافی شرط‌لرین بوغدا یئتیشدیرمه‌یه الوئریش‌لی اولماسی ایله ایضاح اولونابیلر بو وضعیت. تورک‌لرین مدنیت تاریخینده تاخیلین بیر اکینچیلیک محصولو اولماغین دا باشقا بیر معناسی واردیر اصلینده. بوللوغون، برکتین سمبولودور بوغدا. عنعنوی تورک صنعتینده بوغدا فیگورو چوخ ایستیفاده ائدیلیر. خالچا‌لارین، کیلیم‌لرین، سرامیک و یا تاختا بزک‌لرین اوزرینده راست گله‌بیلیرسیز بوغدا موتیوینه.

بوغدانین قیریلیب، پارچالانماسی ایله اورتایا چیخان بولغور دا سنتی تورک مطبخی‌نین اساس واسطه‌لرین‌دن بیری‌دیر. بولغور الده ائتمک اوچون بوغدا، اوّل یویولور، قورودولور. سونرا قابیغین‌دان آیریلا‌راق دییرمان‌لاردا موختلیف بؤیوکلوکده پارچا‌لانیر. بؤیوک دنه‌لر داها چوخ دوگو کیمی ایستیفاده ائدیلرکن، کیچیک، یعنی اینجه اولان‌لار سالاد‌لاردا و کوفته‌لرده ایستیفاده اولونور. بوگون اینجه بولغورلا پیشیریلن، وئگان‌لارین/ات‌سیز یئمک یئینلرین ده راحتلیقلا یئیه‌جگی بیر یئمک تعریفی وئرجه‌ییک. بیر نوع سالاد کیمی حسابلی‍یابیله‌جگیمیز بو یئمگین آدی "کیسیر".

 بیر بالاجا فرق‌لرله ده اولسا تورکیه‌ده دئمک اولار کی، هر یئرده گؤرولن، چای ساعات‌لاری‌نین اونودلماز خؤرک‌لرین‌دن بیری اولان کیسیر اوچون لازیم اولانلار:

2  ایستکان اینجه بولغور

2  ایستکان ایستی سو

1  قاشیق بامادور روبو

1  قاشیق بیبر روبو (اگر تاپماسانیز بامادور روبو آرتیرابیلیرسینیز)

1/3  ایستکان زیتون یاغی

1  عدد قابیغی سویولموش و خیردا دوغرانمیش بامادور

7-8  بوداق اینجه دوغرانمیش تازا سوغان،

1  باش خیردا دوغرانمیش سوغان

1  دسته اینجه قیییلمیش جعفری

½  دسته تزه نعناع

1  لیمون سویو

1  شیرین قاشیغی ایستی‌اوت

1  شیرین قاشیغی دوز

½  شیرین قاشیغی زیره/کیمون (ایسته‌یه باغلی)

9-10  یاپراق کاهی

زامان گلدی کیسیر حاضیرلاماغا؛

اینجه بولغوری گئنیش بیر قابا آلین. اوزرینه ایستی سو علاوه ائدین و کاسانین اوستونو اؤرتون. بولغور یوموشایانا قدر، تخمینن 15-20 دقیقه گؤزله‌یین. یوموشالمیش و بوتون سویونو چکمیش بولغوری دنه دنه اولماسی اوچون یاخشی قاریشدیرین. اوزرینه بامادور و بیبر روبو، زیتون یاغینی و لیمون سویونو علاوه ائدین و هامی‌سی‌نین قاریشدیرین. سونرا سوغانی، تازه سوغانی، بامادورو، جعفری و نعناع علاوه ائدین. دوز و ادویه‌لر ایله لذتلندیرین. کیسیر آرتیق یئمه‌یه حاضیردیر. کاهی یاپراق‌لاری ایله سرویس ائده بیلیرسیز. عافیت اولسون!