تورک جمهوریتلرینین گوند‌مینده‌کی حادثه‌لر
آذربایجان جمهورباشقانی ایلهام علییئو ییغینجاق اوچون باکی‌دا اولان استخبارات تشکیلاتلاری باشقانلارینی قبول ائتدی
۹ اکتبر ۲۰۲۳ تاریخینده تورکمنیستان جمهورباشقانی سردار بردی‌محمدوو قوزئی مقدونیه خاریجی ایشلر باخانی و آوروپا گوونلیک و امکداشلیق تشکیلاتی دؤنم باشقانی بویار عثمانینی قبول ائتدی. گؤروشمه‌ده تورکمنیستانین آوروپا گوونلیک و امکداشلیق تشکیلاتی ایله امکداشلیق قونوسو ماسایا یاتیردیلدی.
تورکیه جمهوریتی خاریجی ایشلر باخانی حاکان فیدان ۱۰-۱۱ اکتبر ۲۰۲۳ تاریخلرینده تورکمنیستانا رسمی سفر گئرچکلشدیردی. تورکمنیستان جمهورباشقانی سردار بردی‌محمدوو باخان فیدانی قبول ائتدی. گؤروشمه‌دن سونرا جمهورباشقانی بردی‌محمدووون یاخین زاماندا تورکیه‌یه سفر گئرچکلشدیرجگی آچیقلاندی.
۱۱ اکتبر ۲۰۲۳ تاریخینده باکی‌دا موستقیل دؤولتلر بیرلیگی ۵۳.جو میللی استخبارات تشکیلاتلاری ییغینجاغی گئرچکلشدیریلدی. ییغینجاقدا بؤلگه‌سل گوونلیک قونوسو اله آلیندی. آذربایجان جمهورباشقانی ایلهام علییئو ییغینجاق اوچون باکی‌دا اولان استخبارات تشکیلاتلاری باشقانلارینی قبول ائتدی.
۱۲ اکتبر ۲۰۲۳ تاریخینده قازاقیستان جمهورباشقانی قاسیم جومرد توکایئو اولوسلارآراسی دیجیتل برئج ۲۰۲۳ فورومونون آچیلیشینا قاتیلدی. فوروما ۳۰ اؤلکه‌دن ۲۰ میندن چوخ نماینده قاتیلدی. فورومدا اینفورماسیون ساحه‌سینده‌کی یئنیلیکلر موذاکیره ائدیلدی. جمهورباشقانی توکایئو عینی گون فوروم چرچیوه‌سینده تشکیل ائدیله‌ن اولوسلارآراسی دیجیتل بریئج تکنولوژی سرگیسینی گزدی. قاسیم جومرد توکایئو آرالاریندا اسپیس اکس، تیک توکون دا اولدوغو اولوسلارآراسی شیرکتلرین ایداره‌چیلرینی آیری آیری قبول ائتدی.
۱۲ اکتبر ۲۰۲۳ تاریخینده روسیا فدراسیونو دؤولت باشقانی ولادیمیر پوتین قیرقیزیستانا رسمی سفر گئرچکلشدیردی. قیرقیزیستان جمهورباشقانی سادیر جاپاروو و ولادیمیر پوتین گؤروشمه‌سیندن سونرا، ایکی اؤلکه آراسیندا ۷ آنلاشما ایمضالاندی. جمهورباشقانلاری مطبوعات منسوبلارینا آچیقلامالار وئردیلر. قیرقیزیستانین هاوا گوونلیگینین روسیا طرفیندن قوروناجاغینا دایر آنلاشمانین تصدیقلندیگی ایفاده ائدیلدی.
۱۳ اکتبر ۲۰۲۳ تاریخینده بیشکئک‌ده موستقیل دؤولتلر بیرلیگی ذیروه‌سی گئرچکلشدیریلدی. ذیروه‌یه آذربایجان، بلاروس، قازاقیستان، قیرقیزیستان، روسیا، اؤزبکیستان، تاجیکیستان و تورکمنیستان جمهورباشقانلاری قاتیلدی. ارمنیستان باشباخانی نیکول پاشینیان ذیروه اولینده جمهورباشقانی سادیر جاپارووا تلفون ائدرک ییغینجاغا قاتیلمایاجاغینی بیلدیرمیشدی.
۱۳ اکتبر تاریخینده ارمنیستان جمهورباشقانی واهاگن خاچاتوریان، روما ایستاتوسونون تصدیقله‌نمه‌سینه باغلی قانونو ایمضالادی. بیشکئک‌ده‌کی ذیروه چرچیوه‌سینده چوخ ساییدا ایکیلی گؤروشمه‌لر ائدیلدی. گئچه‌ن آی آمریکا و آلمانیانین اورتا آسیا اؤلکه‌لری ایله اوست سویه ذیروه‌لر ائتمه‌سی، ارمنیستانین روسیادان اوزاقلاشماغا باشلاماسی کیمی فاکتورلار کرملینی موستقیل دؤولتلر بیرلیگی اؤلکه‌لرینده داها تأثیرلی اولماغا مجبور قیلیر.
***
۱۲ اکتبر ۲۰۲۳ تاریخینده ماجاریستان باشباخانی ویکتور اوربان گورجوستانا رسمی سفر گئرچکلشدیردی. ویکتور اوربان گورجوستان باشباخانی ایراکلی گاریباشویلی ایله گورجوستانین آوروپا بیرلیگی سوره‌جی، ماجاریستان-گورجوستان ایلیشکیلری، بؤلگه‌سل گوونلیک قونولارینی موذاکیره ائتدیلر.
هفته سونو آذربایجان جمهورباشقانی ایلهام علییئو گورجوستانا سفر گئرچکلشدیرمیشدی.
۱۳ اکتبر ۲۰۲۳ تاریخینده قوزئی قیبریس تورک جمهوریتی جمهورباشقانی ارسین تاتار آذربایجانا رسمی سفر گئرچکلشدیردی. عینی گون باکی‌دا قوزئی قیبریس تورک جمهوریتینین مدنیت و تانیتیم گونلرینین آچیلیشی ائدیلدی. ۱۴ اکتبر تاریخینده آذربایجان جمهورباشقانی ایلهام علییئو و جمهورباشقانی تاتار باکی‌دا گؤروشمه گئرچکلشدیردیلر.
