آوراسیا جمهوریتلرینین گوند‌می
آذربایجانین آردین‌دان تورکمنیستان دا اسرائیلده ائلچیلیک آچماغی پلانلاییر
گئچن هفته آوراسیا جمهوریتلرینده اؤنملی سفرلر و حادثه‌لر میدانا گلدی.
چین خالق جمهوریتی ساوونما باخانی لی شانگفو ایلک خاریج سفرینی ۱۶-۱۸ آوریل ۲۰۲۳ تاریخلرین‌ده روسیا فدراسیونونا گئرچکلشدیردی. ۱۷ آوریل تاریخینده روسیا دؤولت باشقانی ولادیمیر پوتین چین ساوونما باخانینی قبول ائتدی. صاباحی‌سی گون باخان لی شانگفو روسیا ساوونما باخانی سرگئی شویگو ایله گؤروشدو. گؤروشمه‌ده ایکی اؤلکه‌نین ساوونما امکداشلیغینین اؤنمینه وورغو ائدیلدی. خاطیرلاتماق لازیمدیر کی آمریکا لی شانگفویا تحریم تطبیق ائتمیشدی.
۱۷ آوریل ۲۰۲۳ تاریخینده تاتاریستان جمهوریتی رئیسی روستم میننیخانووون مولداوییه گیریشینه ایجازه وئریلمه‌دی. قاقاووزیادا تشکیل ائدیله‌جک اولوسلارآراسی خالق دیپلوماسیسی کنگره‌سینه قاتیلماق اوچون مولداوییه گلن میننیخانوو باتینین تحریم لیستینده اولدوغو اوچون هاوالیمانین‌دان گئری دؤنمک مجبوریتینده قالدی. بو یاخینلاردا قاقاووزیا جمهورباشقانی نامیزدی ویکتور پتروو تاتاریستانا سفر گئرچکلشدیرمیش و روستم میننیخانووو اؤلکه‌سینه دعوت ائتمیشدی.
اسرائیل خاریجی ایشلر باخانی الی کوهن ۱۹-۲۰ آوریل ۲۰۲۳ تاریخلرین‌ده آذربایجان و تورکمنیستانا دیپلوماتیک سفر گئرچکلشدیردی. باخان الی کوهن باکی‌دا آذربایجان جمهورباشقانی ایلهام علییئو طرفین‌دن قبول ائدیلدی. آذربایجان خاریجی ایشلر باخانی جئیحون بایراموو الی کوهن گؤروشمه‌سینده ایکی اؤلکه ایلیشکیلرینه باغلی موختلیف قونولار اله آلیندی.
اسرائیل خاریجی ایشلر باخانی کوهن ۲۰ آوریل ۲۰۲۳ تاریخینده تورکمنیستان جمهورباشقانی سردار بردی‌محمدوو ایله بیر آرایا گلدی و عینی گون تورکمن قونومداشی راشید مردوو ایله ایکی‌لی و بؤلگه‌سل قونولاردا هر طرفلی گؤروشمه ائتدی. ایکی باخان داها سونرا اسرائیل عشق آباد ائلچیلیگینین یئنی بیناسینین آچیلیشینی گئرچکلشدیردیلر. الی کوهن سون ۲۹ ایلده تورکمنیستانا سفر گئرچکلشدیرن ایلک اسرائیل خاریجی ایشلر باخانی اولدو. آذربایجانین آردین‌دان تورکمنیستان دا اسرائیلده ائلچیلیک آچماغی پلانلاییر.
***
آمریکا خاریجی ایشلر باخانی آنتونی بلینکن فوریه آیی سونو مارس آیی باشیندا قازاقیستان و اؤزبکیستانا سفر گئرچکلشدیرمیشدی. آمریکانین روسیا اطرافین‌داکی آوراسیا اؤلکه‌لری ایله ایلیشکیلرینه آغیرلیق وئردیگی سون دؤورده تئز تئز گئرچکلشن گؤروشمه‌لردن ده آیدین اولماقدادیر. مثلاً، ۵ آوریل تاریخینده تورکمنیستان جمهورباشقانی سردار بردی‌محمدوو اؤلکه‌ده اولان آمریکا‌لی ایش آداملار هیئتینی قبول ائتدی. ۷ آوریل تاریخینده آمریکا خاریجی ایشلر باخانینین گونئی و اورتا آسیا ایشلرین‌دن مسئول کؤمکچیسی دونالد لو قیرقیزستان جمهوریتی خاریجی ایشلر باخان کؤمکچیسی آی‌بک مولدوگازیئو ایله واشینگتون‌دا گؤروشمه گئرچکلشدیردی. دونالد لو ۲۲-۲۷ آوریل تاریخلرین‌ده قیرقیزیستان و تاجیکیستانا سفر گئرچکلشدیردی. آمریکا خاریجی ایشلر باخان کؤمکچیسی ویکتوریا نولاند ۱۹-۲۰ آوریل ۲۰۲۳ تاریخلرین‌ده موغولستانا سفر ائتدی. ویکتوریا نولاند اولانباتوردا موغولستان باش باخانی لووساننامسراین اویون-ارده‌نه و موغولستان خاریجی ایشلر باخانی باتمونخ باتستسگ ایله آیری آیری گؤروشدو. ۱۹ آوریل تاریخینده آذربایجان جمهورباشقانی ایلهام علییئو آمریکا خاریجی ایشلر باخانلیغی آوروپا و آوراسیا ایشلری بوروسو مستشار کؤمکچیسی اریکه اولسون ایله گؤروشدو. اریکه اولسون عینی گون ارمنیستان باشباخانی نیکول پاشینیان ایله ده گؤروشدو. ۵ آوریل تاریخینده آمریکا حکومتی ۳ گورجو یارغیجا تحریم تطبیق ائتدیگینی آچیقلادی.
