تورک جمهوریتلرینین گوندمیندهکی حادثهلر
تورکسوی یازارلار بیرلیگینین ایلک ییغینجاغی اؤزبکیستانین نوایی شهرینده ۲۹-۳۰ مارس ۲۰۲۳ تاریخلرینده گئرچکلشدیریلدی
گئچهن هفته تورک جمهوریتلرینده اؤنملی سفرلر و ییغینجاقلار گئرچکلشدیریلدی. ایندی اونلارا سیراسی ایله باخاجاغیق.
ماجاریستان جمهورباشقانی کاتالین نوواک ۲۹-۳۱ مارس ۲۰۲۳ تاریخلرینده تورکیهیه رسمی سفر گئرچکلشدیردی. نوواک آنکارادا جمهورباشقانی رجب طیب اردوغان طرفیندن مراسیمله قارشیلاندی. گؤروشمه سونوندا ائدیلهن اورتاق مطبوعات توپلانتیسیندا جمهورباشقانی اردوغان، "تاناپدان ماجاریستانا طبیعی گاز وئریلمهسی قونوسوندا بیز، آذربایجان ایله بیرلیکده هر جور دستگی وئرمهیه حاضیریق" آچیقلاماسینی وئردی. ماجاریستان جمهورباشقانی تورکیه بؤیوک میللت مجلیسی باشقانی مصطفی شنتوپ ایله ده گؤروشدو. جمهورباشقانی نوواک سفر چرچیوهسینده آدانا، حاتای و قوجا ائلینه سفر ائتدی.
ماجاریستان، تورکیه باشدا اولماق اوزره تورک جمهوریتلری ایله یاخین امکداشلیق ایچیندهدیر. تورکیه ایله ماجاریستان، فنلاند و سوئدین ناتو عضولوگو قونوسوندا اورتاق حرکت ائدیرلر.
۳۰ مارس ۲۰۲۳ تاریخینده بوداپستده تورک دؤولتلر تشکیلاتی انرژیدن مسئول باخانلار ۳.جو ییغینجاغی گئرچکلشدیریلدی. ییغینجاقدا انرژی تهلوکهسیزلیگی، انرژی صادراتی و قویولاجاق سرمایه قونولاری اله آلیندی. بو قونو ایله باغلی اولاراق ایفاده ائدیلمهلیدیر کی، تورک دؤولتلر تشکیلاتی اولوسلارآراسی یئنیلنهبیلیر انرژی آژانسی ایله آنلاشما متنی ایمضالادی.
۲۸ مارس ۲۰۲۳ تاریخینده بیشکئکده تورک آکادمیسی بیلیم قورولو ۶.جی عادی ییغینجاغی گئرچکلشدیریلدی. ییغینجاغا آذربایجان، قیرقیزیستان، قازاقیستان، ماجاریستان و تورکیهدن مقاملار قاتیلدی. ییغینجاقدا آکادمی باشقانی شاهین مصطفییئو، آکادمینین ۲۰۲۲ ایلی فعالیت راپورونو سوناراق، ۲۰۲۳-جو ایله عاید پروژهلر پلانی حاقیندا معلومات وئردی. آیریجا تورک آکادمیسینین اؤنجهلیکلی فعالیت ساحهلری قبول ائدیلدی. تورک آکادمیسی بیلیم قورولونون بیر سونراکی ییغینجاغی باکیدا ائدیلهجک.
تورکسوی یازارلار بیرلیگینین ایلک ییغینجاغی اؤزبکیستانین نوایی شهرینده ۲۹-۳۰ مارس ۲۰۲۳ تاریخلرینده گئرچکلشدیریلدی. ییغینجاقدا تورک جمهوریتلری یازارلارینین مسئلهلری موذاکیره ائدیلدی. اؤزبکیستان طرفیندن یاییملانان۱۰۰ جیلدلیک تورک دونیاسی سئچمه اثرلری تانیدیلدی. فعالیت چرچیوهسینده اولوسلارآراسی ممتاز شعیر فستیوالی ائدیلدی. ایفاده ائتمک لازیمسا، تورکسوی یازارلار بیرلیگی ۶ مارس ۲۰۲۳ تاریخینده قورولموشدو.
***
چین خالق جمهوریتی اویغور اؤزارک بؤلگهسی کمونیست پارتی کمیتهسی کاتیبی ما شینگروئی ۲۷-۳۱ مارس تاریخلرینده قازاقیستان و قیرقیزیستانا سفر گئرچکلشدیردی. قازاقیستان و قیرقیزیستان جمهورباشقانلاری طرفیندن قبول ائدیلهن ما شینگروئی، حکومت باشقانلاری و دیگر مسئوللار ایله گؤروشمهلر ائتدی. پاندمی سببی ایله سرحدلرینی باغلایان چین، یاواش یاواش قونشولاری ایله سرحدلرینی یئنیدن آچیر. می آییندا چین - اورتا آسیا ذیروهسینین ائدیلهجگی بیلدیریلمیشدی.
۲۸-۳۰ مارس ۲۰۲۳ تاریخلرینده آذربایجان خاریجی ایشلر باخانی جئیحون بایراموو اسرائیل و فیلیسطینه رسمی سفر گئرچکلشدیردی. جئیحون بایراموو سفر چرچیوهسینده سؤز قونوسو اؤلکهلرین خاریجی ایشلر باخانلاری ایله گؤروشدو. ۳۰ مارس تاریخینده باخان بایراموو اسرائیل جمهورباشقانی اسحاق هرتزوگ ایله گؤروشدو. تل آویوده آذربایجان ائلچیلیگی آچیلدی.
گلیشمهلردن گؤرولدوگو اوزره گئچهن هفته تورک جمهوریتلرینده اؤنملی سفرلر و تورک بیرلیگینی گوجلهندیرهجک ییغینجاقلار گئرچکلشدیریلدی.
ایلگیلیلی خبرلر
تۆرک جمهوریتلرینین گوندمیندهکی گلیشمهلر
حاضردا دونیانین ۱۵ اؤلکهسینده ۲۹ آذربایجان ائوی خیدمت ائتمکدهدیر