تۆرکیه‌ده میدانا گلن زلزله و تۆرک دونیاسینین یاردیملاری
ساخا جمهوریتیندن آوروپانین ایچلرینه قدر مدنی قورولوشلار، یئرلی یؤنه‌تیملر، تۆرک جمهوریتلرینین حکومتلری، توپلانان کؤمکلری یا اؤز ایمکانلاری یا دا تۆرکیه‌لی مسئوللار واسطه‌سی ایله تۆرکیه‌یه چاتدیرماغا باشلادیلار
۶ فوریه ۲۰۲۳ تاریخینده تۆرکیه؛ ۷،۶ و ۷،۸ بؤیوکلویونده ایکی شدتلی زلزله ایله سارسیلدی. فلاکتین مرکزی، اؤلکه‌نین گونئیینده‌کی قهرمان ماراش بؤلگه‌سی اولدو. "عصرین فلاکتی" اولاراق آدلاندیریلان زلزله‌دن تۆرکیه‌نین ۱۰ بؤلگه‌سی ائتکیلندی. شدتلی سارسینتیلار سوریه،قیبریس، گورجوستان، آبخازیا، ارمنیستان، عراق و لبناندا دا حس ائدیلدی. زلزلهده ۳۰ میندن چوخ اینسان حیاتینی ایتیردی. ۱۰۰ مین دولاییندا اینسان یارالاندی.
تۆرک دونیاسی و تۆرک جمهوریتلری زلزله‌نین میدانا گلدیگی آندان اعتباراً بوتون ایمکانلاری ایله تۆرکیه اوچون سفربر اولدولار.
قوزئی قیبریس تۆرک جمهوریتی تۆرکیه ایله بیرلیکده یئددی گونلوک یاس اعلان ائتدی. تۆرک جمهوریتلرینین اولوسلارآراسی قورولوشلاری اولان تۆرک دؤولتلر تشکیلاتی، تۆرک‌سوی، تۆرک‌پا، اولوسلارآراسی تۆرک میراث وقفی، اولوسلارآراسی تۆرک آکادمیسی بایراقلاری یارییا ائندیریلدی.
تۆرک جمهوریتلرینین جمهورباشقانلاری ایلک آندان اعتباراً جمهورباشقانی رجب طیب اردوغان ایله تماسا گئچدیلر. تۆرکیه‌یه ایلک مرحله‌ده لازیم اولاجاق شئیلر قونوسوندا مشورت ائتدیلر. تۆرک جمهوریتلرینین جمهورباشقانلاری ایر‌لیله‌یه‌ن گونلرده تۆرکیه‌نین ائلچیلیکلرینه گئده‌رک تۆرکیه خالقینا باش‌ساغلیغیلارینی چاتدیردیلار. ۱۱ فوریه تاریخینده آذربایجان خاریجی ایشلر باخانی جئیحون بایراموو زلزله بؤلگه‌سینه گئتدی.
تۆرک جمهوریتلری جمهورباشقانلارینین تلاپشیریقلاری اوزرینه تۆرکیه‌یه آختارما قورتارما قروپلاری، دکتر و ایلک یاردیم لوازیمی گؤندریلمه‌یه باشلاندی.
بیر هفته آرالیغیندا تۆرکیه‌یه آذربایجان ۷۲۵، اؤزبکیستان ۱۷۱، قازاقیستان ۱۰۱، قیرقیزیستان ۱۴۶، ماجاریستان ۱۵۶، قوزئی قیبریس تۆرک جمهوریتی ۲۰۰، باشقوردیستان ۲۵ و تۆرکمنیستان ۱۰ نفرلیک آختارما قورتارما اکیبی گؤندردی. بئله‌لیکله خاریجیندن ان چوخ قورتاریجی تۆرک جمهوریتلریندن گلمیش اولدو. تۆرک جمهوریتلریندن گلن قورتاریجیلار ایندییه قدر یوزدن چوخ اینسانی ییخینتی آلتیندان ساغ چیخارماغی باجاردیلار.
گؤندریله‌ن بو اکیپلرده دکتر و ساغلیق چالیشانلاری دا وار. آذربایجان، اؤزبکیستان، قازاقیستان و قیرقیزیستان زلزله بؤلگه‌سینده صحرا خسته‌خانالاری قورماغا باشلادیلار. آذربایجانلی مقاملار زلزلهده یارالانان ایکی مین یارالینی آذربایجاندا معوالیجه ائتمه‌یه حاضر اولدوقلارینی بیلدیردیلر.
***
تۆرک دونیاسی تۆرکیه‌نین اون بؤلگه‌سینده میدانا گلن زلزله‌یه یاردیمچی اولماق اوچون یاردیم کمپینی باشلاتدی. ساخا جمهوریتیندن آوروپانین ایچلرینه قدر مدنی قورولوشلار، یئرلی یؤنه‌تیملر، تۆرک جمهوریتلرینین حکومتلری، توپلانان کؤمکلری یا اؤز ایمکانلاری یا دا تۆرکیه‌لی مسئوللار واسطه‌سی ایله تۆرکیه‌یه چاتدیرماغا باشلادیلار. ایندییه قدر بورالاردان اونلارجا اوچاق، یوزلرجه تریلی تۆرکیه‌یه گلدی.
تۆرکیه‌ده یاشایان تۆرک دونیاسی نماینده‌لری ده تشکیلاتلاناراق زلزله بؤلگه‌سینه گئتدیلر. بیر قیسمی آختارما قورتارما اکیبینده وظیفه یئرینه یئتیررکه‌ن، دیگر قیسمی وطنداشلارا یئمک، ایلک یاردیم لوازیمی پایلاییر.
سون حادثه‌لر گؤستردی کی تۆرک دونیاسی بو جور حادثه‌لر قارشیسیندا اسکییه مقایسه‌ده داها گوجلو، داها بیلینجلی، داها موتشکیل و داها تأثیرلی قونومدادیر. تۆرکیه گوجلو بیر دؤولتدیر و بو زلزله‌نین یارالارینی قیسا مدتده ساراجاق. بو مدتده تۆرک دونیاسینین مادی، معنوی دستگی آنادولویا گوج وئره‌جک.
