تۆرک جمهوریتلرینده گئرچکلشن اؤنملی سفرلر
قارشیلیقلی سفرلر سایهسینده، تۆرک جمهوریتلرینه اؤلکه دیشیندان سرمایهلرین گلمهسی تامین ائدیلیر
گئچهن هفته آذربایجان و قازاقیستان جمهورباشقانلاری بیرلشمیش عرب امرلیکلرینه سفر گئرچکلشدیردیلر و "ابوظبی سۆردورولهبیلیرلیک هفتهسی ۲۰۲۳" ذیروهسینده ایشتیراک ائتدیلر. ۱۵ ژانویه ۲۰۲۳ تاریخینده آذربایجان جمهورباشقانی ایلهام علییئو بیرلشمیش عرب امرلیکلرینه ایش سفری گئرچکلشدیردی. جمهورباشقانی علییئو ابوظبیده دؤولت باشقانی شیخ محمد بن زاید آل نحیان ایله گؤروشدو. گؤروشمهده ایکیلی ایلیشکیلرله باغلی مسئلهلر اله آلیندی.
قازاقیستان جمهور باشقانی قاسیم جؤمرت توکایئو ۱۶-۱۸ ژانویه ۲۰۲۳ تاریخلرینده بیرلشمیش عرب امرلیکلرینه رسمی سفر گئرچکلشدیردی. جمهورباشقانی توکایئو، بیرلشمیش عرب امرلیکلری دؤولت باشقانی شیخ محمد بن زاید آل نحیان طرفیندن مراسیمله قارشیلاندی. داها سونرا هیئتلر آراسی گؤروشمه ائدیلدی. گؤروشمهلردن سونرا طرفلر آراسیندا ۹ آنلاشما ایمضالاندی. طرفلر اورتاق تیجارت حجمینی ۱ میلیارد دلارا چیخارماغی هدفلهییرلر. جمهورباشقانی توکایئو سفر چرچیوهسینده عرب امیرلری و اؤنده گلن عرب سرمایهچیلر ایله آیری آیری گؤروشمهلر گئرچکلشدیردی. آیریجا قازاقیستان جمهورباشقانی توکایئو، عرب ایش آداملاری ایله توپلانتی تشکیل ائتدی.
آذربایجان جمهور باشقانی ایلهام علییئو، ۱۷-۱۹ ژانویه ۲۰۲۳ تاریخلرینده سوئیسه سفر گئرچکلشدیردی. داووس دونیا اقتصاد فورومونا قاتیلان ایلهام علییئو، فوروم چرچیوهسینده لتونی و لیتوانی جمهورباشقانلاری، کروواسی و هلند باشباخانلاری، بیرلشمیش میللتلر، آوروپا بیرلیگی کیمی اولوسلارآراسی قورولوشلارین مسئوللاری و اولوسلارآراسی شیرکتلرین یؤنهتیچیلری ایله گؤروشمهلر گئرچکلشدیردی. آذربایجانین انرژی قایناقلارینین آوروپایا گؤندریمی مسئلهسی گۆندمدهکی اؤنمینی قورویور.
اؤزبکیستان جمهور باشقانی شؤوکت میرضیایئو ۱۷-۱۸ ژانویه ۲۰۲۳ تاریخلرینده سنگاپور جمهوریتینه دؤولت سفری گئرچکلشدیردی. جمهورباشقانی شؤوکت میرضیایئو، سنگاپور جمهورباشقانی حلیمه یعقوب و باشباخان لی هسین لونگ ایله آیری آیری گؤروشمهلر گئرچکلشدیردی. گؤروشمهلر سونوندا طرفلر آراسیندا ۷ آنلاشما و اؤزبکیستان-سنگاپور سرمایه شیرکتینین قورولماسینا دایر مموراندوم ایمضالاندی. میرضیایئو، سفر چرچیوهسینده لی کوان یئو دیپلوماسی اوخولونو گزدی و اؤلکهنین اؤنده گلن ایش آملاری ایله گؤروشدو. ایکی اؤلکه آراسینداکی تیجارت حجمی سون ایللرده ایکی قاتینا آرتمیش وضعیتدهدیر.
***
گئچهن هفته تۆرکمنیستانا اؤنملی سفرلر گئرچکلشدیریلدی. ۱۸ ژانویه تاریخینده تاتاریستان جمهورباشقانی روستم مینیحانوو عشق آبادا سفر ائتدی. روستم مینیحانوو، تۆرکمنیستان مجلیس باشقانی قوربانقولو بردیمحمدوو ایله گؤروشدو. ۱۹ ژانویه ۲۰۲۳ تاریخینده روسیا باشباخانی میخائیل میشوستین تۆرکمنیستانا ایش سفری گئرچکلشدیردی. باشباخان میشوستین ایلک اؤنجه عشقآباددا اولان تۆرکمن-روس اوخولونا گئتدی. داها سونرا میشوستین، جمهورباشقانی سردار بردیمحمدوو و خالق مصلحتی باشقانی قوربانقولو بردیمحمدوو ایله آیری آیری گؤروشدو. گؤروشمهلردن سونرا میخائیل میشوستین تۆرکمنیستان-روسیا ایش فورومونا قاتیلدی. عشقآباد شهرینده روسیا تیجارت ائوینین آچیلیشی گئرچکلشدیریلدی.
گلیشمهلردن گؤرولدوگو اوۆزره، گئچهن هفته آذربایجان، قازاقیستان و اؤزبکیستان جمهورباشقانلاری اؤنملی خاریج سفرلری گئرچکلشدیردیلر. سؤز قونوسو سفرلرده اقتصاد آنا گۆندمی اولوشدوردو. بو جور قارشیلیقلی سفرلر سایهسینده، تۆرک جمهوریتلرینه اؤلکه دیشیندان سرمایهلرین گلمهسی تامین ائدیلیر.