قازاقیستان جمهورباشقانینین قیرقیزیستان جمهوریتینه سفری
قیرقیزیستان-قازاقیستان امکداشلیغینین گۆجلنمه‌سی تۆرکوستانین داها دا گوجلو اولماسینا قاتقی وئره‌جک
قازاقیستان جمهورباشقانی قاسیم جومرت توکایئو، ۲۶ می ۲۰۲۲.جی ایل تاریخینده قیرقیزیستانا بیر گونلوک رسمی سفر ائتمیشدی. قیرقیزیستان جمهورباشقانی سادیر چاپاروو توکایئوی بیشکئکده‌کی آلا آرچا دؤولت سارایین‌دا رسمی مراسیمله قارشیلادی. قارشیلاما مراسیمیندن سونرا ایکی لیدئر باش باشا و هیئتلری آراسی گؤروشمه گئرچکلشدیردی. گؤروشمه زامانی ایکیلی ایلیشکیلر و بؤلگه‌سل مسئله‌لر موذاکیره ائدیلدی. گؤروشمه‌نین سونوندا جمهورباشقانلارین اورتاق بیالدیریسی و ایکی اؤلکه آراسیندا ۱۳ آنلاشما ایمضالاندی.
جمهورباشقانی سادیر چاپاروو ژورنالیستلر اوچون تشکیل ائتدیگی مطبوعات توپلانتیسیندا قیرقیزیستان-قازاقیستان سرحدین‌ده اورتاق تیجاری-لجستیک بؤلگه‌نین تیکینتی‌سینه باشلادیقلارینی و قیرقیزیستان-قازاقیستان سرحدین‌ده تریلر گئچیش پروبلئمینی حل ائد‌جکلرینی بیلدیردیلر. جمهورباشقانی توکایئو ایسه قازاقلارا ان یاخین قارداش خالقین قیرقیزلار اولدوغونو سؤیله‌دی. جمهورباشقانلاری اورتاق تیجارت حجمینی ۲ میلیارد دلارا چاتدیرماغی هدفله‌دیکلرینی سؤزلرینه علاوه ائتدی.
آوراسیا اقتصادی بیرلیگی دؤنم باشقانی اولان قیرقیزیستان، عینی گون آوراسیا اقتصادی بیرلیگی ۱.جی آوراسیا اقتصادی فورومونو هیبرید فورمات‌دا گئچیردی. روسیا، ارمنیستان و بلاروس لیدئرلری بو فوروم‌دا آنلاین شکیلده ایشتیراک ائتدیلر. توپلانتیدا بیرلیگین مسئله‌لری مذاکیره اولوندو و بو مسئله‌لرله باغلی سواللار جاوابلاندیریلدی. فوروم‌دا ۱۵ اؤلکه‌دن ۲ مین بئش یوز نفر ایشتیراک ائتدی.
آوراسیا اقتصادی فورومون‌دان سونرا جمهورباشقانلاری جاپاروو و توکایئو فارابی قازاق میللی اونیوئرسیته‌سینین یئنی آچیلان بیشکئک شعبه‌سینی گزدی. داها سونرا جمهورباشقانلاری قازاق شاعری آبای کونانبایئوین هیکلینین آچیلیشینی ائتدیلر. جمهورباشقانی چاپاروو کونانبایئوین هیکلینین آچیلیش مراسیمینده، چینگیز آیتماتوو و ماناسین هیکللرینین یاخین زاماندا دیکه‌له‌جگینی بیلدیردی.
عینی گون قازاقیستان سناسی قیرقیزیستانا حربی-تکنیکی یاردیم حاقیندا ایمضالانان ایکیلی آنلاشمانی اونایلادی. قازاقیستان بوندان اؤنجه ده قیرقیزیستان اوردوسونا حربی-تکنیکی یاردیم ائتمیشدی.
*
جمهورباشقانی قاسیم جومرت توکایئوین قازاقیستان‌دا باش وئره‌ن ژانویه حادثه‌لریندن سونرا داها آکتیو دیش و ایچ سیاست یۆروتمه‌یه باشلادیغی گۆرولمکده‌دیر. مثلاً، جمهورباشقانی توکایئو بیشکئک سفریندن اؤنجه تورکیه‌یه، بیرلشمیش عرب امیرلیکلرینه و روسیایا سفر ائتدی. قونشولارلا یاخین امکداشلیغین داوام ائتدیریلمه‌سی قازاقیستانین خاریجی سیاست اؤنجه‌لیکلریندن بیری‌دیر.
قیرقیزیستان جمهورباشقانی سادیر چاپاروو بیشکئک‌ده گئچیریله‌ن گؤروشمه‌ده قیرقیزیستانلا قازاقیستان آراسیندا ۲۰۰۳.جو ایلده ایمضالانمیش امکداشلیق آنلاشماسینی یئنیدن گؤزئن گئچیرمه‌گی و ایکلی ایلیشکیلری یئنی سویه‌یه یۆکسلتمه‌گی تکلیف ائتدی. قیرقیزیستان و قازاقیستان، تورکیه و آذربایجان‌دا اولدوغو کیمی، ایلیشکیلرینی یئنی سویه‌یه یۆکسلدرک ایکی دؤولت بیر میللت سیاستی حیاتا گئچیره‌بیلرلر. روسیا-باتی ساواشی، افغانیستان‌داکی وضعیت و بؤلگه‌سل گوونلیک مسئله‌لری بئله یاخین امکداشلیغی ضروری قیلیر.
اؤزتله، قازاقیستان جمهورباشقانی قاسیم جومرت توکایئوین قیرقیزیستانا سفری وئریملی اولدو. اؤزللیکله گؤمروک، نقلیات و گوونلیک ساحه‌لرینده اؤنملی آنلاشمالار ایمضالاندی. قیرقیزیستان-قازاقیستان امکداشلیغینین گۆجلنمه‌سی تۆرکوستانین داها دا گوجلو اولماسینا قاتقی وئره‌جک.
