ائلچی‌بئیی آد گۆنونده رحمت و منت‌دارلیقلا یاد ائدیریک!

"تولون‌اوغول‌لاری دؤولتی"، "بوتؤو آذربایجان یولوندا"، "مستقیل‌لیک: ایکینجی جهد" و "سیز خالقین سئوگیسی ایله حاققا چاتاجاقسینیز" اوندان قالان و چاپ اولموش اثرلردیر

2155734
ائلچی‌بئیی آد گۆنونده رحمت و منت‌دارلیقلا یاد ائدیریک!

ابوالفضل قدیرقولو اوغلو ائلچی‌بئی ۲۴ ژوئن ۱۹۳۸-جی ایلده ناخچیوانین اوردوباد رایونونون کلکی کندینده آنادان اولدو.

اورتا مکتبی بیتیردیکدن سونرا 1957-جی ایلده باکی دؤولت اونیوئرسیته‌سینه‌نین شرقشیناسلیق فاکولته‌سینده عرب فیلولوگییاسی شؤعبه‌سینه داخیل اوْلوب تحصیلینی 1968-جی ایلده یوکسک لیسانس درجه‎‌سیله  اوغورلا تاماملادی. 

1975-جی ایلین ژانویه‌سینده آذربایجان دؤولت تهلوکه سیزلیک کومیته‌سی اونو طلبه‌لر آراسیندا میلتچی و آنتی‌سووئت تبلیغاتی آپارماق آدییلا حبس ائدیب 17 جولای 1976-جی ایله‌دک سیاسی دوستاق اولاراق قاراداغ داش کارخاناسیندا آغیر فیزیکی ایشلره محکوم ائتدی.

حبسدن بوراخیلدیقدان سوْنرا 1976-جی ایلین دسامبر آییندا (AMEA) ال یازمالار اینستیتوسوندا کیچیک علمی ایشچی کیمی فعالیته باشلاییب سونرا بورادا بویوک وضعیفه لره یوکسه‌لدی. 

۱۹۸۹-دا آذربایجان خالق جبهه‌سی‌نی قوردو و اؤزوده باشقانی سئچیلدی. ۷ ژوئن ۱۹۹۲ تاریخینده آذربایجان جمهورباشقانلیغی سئچیملرینده ٪۵۹.۴ رای ایله آذربایجانین ایکینجی جمهورباشقانی اولدو.

ائلچی‌بئی آذربایجانین سئووئتلر ایچینده بیر سؤمورگه اولدوغونو سؤیلئمیش و آذربایجانین باغؽمسیز، دموکراتیک بیر جمهورییئت اوْلاجاغینا اینانمیشدیر. سوْسیالیزمه قارشؽیدی. آتاتورک، گاندی و محمد امین رسول‌زاده‌دن تاثیر آلمیشدی. داغؽستان، گۆرجیستان و ارمنیستانا وئریلن توْپراقلارین آذربایجانا قایتاریلماسینا و بۆتون آذربایجان ایدئوولوژیسینه اینانیردی. 

آذربایجان جمهورباشقانی عنوانیندا ۱۹۹۳-جی ایلده آنکارادا آتاتورکون مزاری آنؽت‌قبیری زیارت ائلدیغی زامان آنؽت‌قبیر اؤزل دفترینه بئله یازمؽشدیر: 

"ای بۆیوک تۆرکون بۆیوک قوْموتانی! سنی زیارت ائتمکله اؤزوم و میللتیم آدؽنا شرف دۇیدوم. سنین عسگرین، ائلچی‌بی"

یوْرولمادان دموْکراسی و میللی بیرلیک اۇغروندا مۆباریزه آپاران آذربایجان و دونیا تورکلرینین بؤیوک لیدری ائلچی‌بئی ۲۲ آغوستوس ۲۰۰۰-ده و بیر حالداکی ۶۲ یاشی واردی پروستات سرطانی خسته‌لیغیندان اؤتورو درمان اولدوغو آنکارادا حیاتدان کوچدو. جنازه‌سی باکی‌یا گوتورولن ائلچی‌بئی‌ین دفین مراسیمینده یۆز مینلر اینسان اوْنون تابۇتونو سون منزیلینه چی‌یینلرینده آپاردیلار. او دؤنه‌مین آذربایجان جمهورباشقانی حیدر علی‌یئو ده بو مراسیمه قاتیلمیش و ائلچی‌بئی‌ین جنازه‌سی اؤنونده باش ائگمیشدی.

"تولون‌اوغول‌لاری دؤولتی"، "بوتؤو آذربایجان یولوندا"، "مستقیل‌لیک: ایکینجی جهد" و "سیز خالقین سئوگیسی ایله حاققا چاتاجاقسینیز" اوندان قالان و چاپ اولموش اثرلردیرلر.



ایلگیلی‌لی خبرلر