دونیادا ۷۷۱ میلیون اینسان اوخوما یازما بیلمیر

دونیادا اوچده ایکی‌سینی قادینلارین اولوشدوردوغو ۷۷۱ میلیون یئتیشکین اینسانین ساوادسیز اولدوغو قید ائدیلدی

1877093
دونیادا ۷۷۱ میلیون اینسان اوخوما یازما بیلمیر

دونیادا اۆچده ایکیسینی قادینلارین اولوشدوردوغو ۷۷۱ میلیون اینسان، اوخوما یازما بیلمیر.

بیرلشمیش میللتلر تشکیلاتینین تحصیل، بیلم و مدنیت تشکیلاتینین (یونسکو) یاییملادیغی بیلگیلره گؤره، سون ۵۰ ایلده دونیادا، اؤزللیکله ده گنجلر آراسیندا اوخور یازارلیق نسبتی آرتدی.

آنجاق بو آرتیشا باخمایاراق، ۲۰۲۰.جی ایلده دونیادا اوچده ایکی‌سینی قادینلارین اولوشدوردوغو ۷۷۱ میلیون یئتیشکین اینسانین ساوادسیز اولدوغو قید ائدیلدی.

بیلگیلر، دونیادا اولان ساواشلارین اؤیرنجیلرین اوخولا گئتمه نیسبتلرینه منفی تأثیر ائتدیگینی ده گؤستریر.

بونا گؤره ده افغانیستان، یمن و اوکرایناداکی ساواشلار سببی ایله میلیونلارجا اینسان ائولرینی ترک ائتمک مجبوریتینده قالدی.

بیرلشمیش میللتلر تشکیلاتینین سیغینماچیلار یوکسک کمیسرلیگینین بیلگیلرینه گؤره، بو ایل افغانیستان‌دا ۷۰۰ مین، سون ایللرده ایسه تخمیناً ۵،۵ میلیون اینسان ائولرینی ترک ائتمک مجبوریتینده قالدی. اوکراینادا ساواش ائتکیلنن ۷،۱ میلیون اینسان ائولرینی ترک ائتدی، ۲۰۰۰دن چوخ اوخول خسارت آلدی، ۲۰۰دن چوخ اوخول داغیلدی.

یاییملانان آراشدیرمادا، یئنی نسیل کوروناویروس (کووید-۱۹) ایله باغلی منفی نتیجه‌لر ده یئر آلدی. بونا گؤره، تحصیل پروسه‌سی آخسایان ۲۴ میلیون اینسانین تحصیل سۆره‌جینه قاییدابیلمه‌یه‌جگی تخمین ائدیلیر. بو اینسانلارین ۱۱ میلیونونون دا قیز اوشاقلاری و گنج قیزلار اولاجاغی اؤن‌گؤرولور.

اوخور یازارلیق نسیتی، آفریقا و گونئی آسیا بؤلگه‌سینده آشاغی سویه‌ده‌دیر.

صحرا آلتی آفریقا دونیادا یۆزده ۳۴ ایله ان یوکسک ساوادسیز اینسان نسبتینه صاحبدیر.

آفریقا قاره‌سینده‌کی اؤلکه‌لرده، ۶-۱۱ یاش آراسی هر ۵ اوشاقدان ان آزی بیری اوخولا گئتمیر. ۱۲-۱۴ یاش آراسیندا اولانلار اوچون بو نیسبت هر اوچ اوشاقدان بیریدیر.

دونیادا ساوادلی قادینلارین ساییسی کیشیلردن آزدیر. سون بیلگیلره گؤره، گنج قادینلار ساوادسیز اینسانلارین یۆزده ۵۹لوق بؤلومونو تشکیل ائدیر.



ایلگیلی‌لی خبرلر