اولوسلار آراسی آسپندوس اوپرا و باله فستیوالی
تورکیه مدنیت و توریزم ناظیرلیگی دولت اوپرا و باله (DOB) عمومی مودیرلیگی طرفیندن تشکیل ائدیلن 26. اولوسلار آراسی آسپندوس اوپرا و باله فستیوالی، 1 سپتامبردا باشلایاجاق
تورکیه مدنیت و توریزم ناظیرلیگی دولت اوپرا و باله (DOB) عمومی مودیرلیگی طرفیندن تشکیل ائدیلن 26. اولوسلار آراسی آسپندوس اوپرا و باله فستیوالی، 1 سپتامبردا باشلایاجاق.
باخانلیقدان ائدیلن یازیلی آچیقلامایا گؤره، 26. اولوسلار آراسی آسپندوس اوپرا و باله فستیوالی 1-18 سپتامبردا آنتالیادا رئاللاشدیریلاجاق.
فستیوالین آچیلیشی، بیزهنین مشهور و سئویلن اوپراسی کارمن ایله ائدیلهجک. ایستانبول دولت اوپرا و باله طرفیندن اورکستر شئفی زدراوکو لازاروو رهبرلیگینده صحنهلنهجک اثر، 1 و 2 سپتامبردا آسپندوس آنتیک تئاتریندا صنعتسئورلرله گؤروشهجک. اثر، آنتالیا دولت اوپرا و باله اورکسترا و کوروسو یولداشلیغیندا صحنهلنهجک.
کلاسیک بالهنین شاه اثری "قو گؤلو"، 8 سپتامبردا، وینین 300 ایللیک، کؤکلو باله عنعنهسینین باشاریلی نمایندهسی وین دولت اوپرا و باله بیرلیگی طرفیندن آسپندوسدا تماشایا تقدیم ائدیلهجک.
آنتالیا دولت اوپرا و باله طرفیندن 12 و 13 سپتامبر آخشاملاری ایکی دفعه صحنهلنهجک گؤزل " آیدا" اوپراسی، سهیرلی آسپندوسا قدیم مصری جانلاندیراجاق.
کورو شفی فابریزیو ماریا کارمیناتی رهبرلیگینده آنکارا دولت اوپرا و باله کور صنعتچیلرینین ده یولداشلیق ائدجگی اثرده رادامس باش رولونو 12 سپتامبردا مشهور تئنور، دولت اوپرا و باله باش دیرکتورو و عمومی صنعت رژیسورو مورات کاراحان، " آیدا" باش رولونو مشهور سوپرانو فرانسسکا تیبورزی سسلندیرهجک.
اوپرادا 13 سپتامبردا ایسه " آیدا "باش رولونو آننا نچیوا، رادامس باش رولونو افه کیشلالی، آمنریس رولونو ایسه هر ایکی تمثیلده ده مشهور سوپرانو آناستاسیا بولدیرئوا سسلندیرهجک.
مورات کاراحانین صنعت رژیسسورلوغوندا یارادیلان، دولت اوپرا و باله عمومی مودیرلیگینین گؤزل پروژهسی "ترویا" اپیک اوپراسی، 16 سپتامبردا اکسپودا اولاجاق.
فستیوالین باغلانیشی ایسه 18 سپتامبردا مورات کاراحانین سولیست اولاجاغی گالا کونسریله ائدیلهجک. مشهور ایتالیان شئف فابریزیو ماریا کارمیناتی رهبرلیگینده آنتالیا دولت اوپرا و باله اورکستری، کاراحانآ یولداشلیق ائدهجک.