تورکییه‌ده ۱۷۰ اؤلکه‌دن اؤیرنجی‌ وار

"حاضیردا ۱۷۰دن چوخ اؤلکه‌دن اؤیرنجینی، تورکییه‌ده دؤولتیمیز آدینا بورسلو اولاراق اوخودوروق"

1245063
تورکییه‌ده ۱۷۰ اؤلکه‌دن اؤیرنجی‌ وار

یورددیشی تورکلر و قوهوم توپلولوقلار (یتب) باشقانی عبدالله ارن، تورکییه‌ده ۱۷۰ اؤلکه‌دن ۱۶ مین اؤیرنجی‌نین تحصیل آلدیغینی بیلدیردی.

یتب، بیرلشمیش میللتلر تشکیلاتینین سیغینماچیلار یوکسک کمیسرلیگی تورکییه، تورکییه رادیو تلویزیون قورومو (ت‌رت) وورلد ریسرچ سنتر و ت‌رت وورلد سیتیزن ایش بیرلیگیله گئچیریلن "اولوسلارآراسی قوروما آلتین‌داکی اؤیرنجی‌لرین یوکسک تحصیلی کنفران‌سی" ایستانبول‌دا باشلادی.

یتب باشقانی عبدالله ارن، کنفران‌سین آچیلیشین‌دا، ۲۰۱۱.جی ایلده‌ن اعتباراً "تورکییه بورسلاری" آدی آلتین‌دا بیر مارکا یاراتدیقلارینی و دونیانین موختلیف اؤلکه‌لرین‌دن اؤیرنجی‌لری تورکییه‌ده قوناق ائدیب بورس وئردیکلرینی بیلدیررک،

"حاضیردا ۱۷۰دن چوخ اؤلکه‌دن اؤیرنجینی، تورکییه‌ده دؤولتیمیز آدینا بورسلو اولاراق اوخودوروق. ۱۷۰ اؤلکه‌دن ۱۶ مین اؤیرنجی وار" ایفاده‌لرینی ایشلتدی.

ارن، تورکییه‌نین اؤلکه‌یه سیغینانلارلا باغلی سککیز ایل بویونجا چوخ اوغورلو و اینسانی بیر چالیشما یئریتدیگینی قید ائد‌رک، اولوسلارآراسی مخاطبلرین ده بوندان اؤوگو ایله دانیشدیغینی خاطیرلاتدی.

تورکییه‌نین بوتون قوروملارینین، چوخ حرفه‌ای بیر شکیل‌ده جدی چابا گؤستردیگینی وورغولایان ارن،

"بیزلر ایستر بیرلشمیش میللتلر تشکیلاتینین سیغینماچیلار یوکسک کمیسرلیگی ایستر آوروپا بیرلیگی فوندلاری واسطه‌سیله ده بیر چوخ اؤیرنجی‌یه بورس ایمکانی یارادیریق. دیگر طرف‌دن سیغینماچیلاردان یوزده بیر اورانیندا اونیورسیته‌یه گئتمه، اورانی وارکن، تورکییه یوزده آلتییلا بو ساحه‌ده رکورد قیریر" دئدی.

بیرلشمیش میللتلر تشکیلاتینین سیغینماچیلار یوکسک کمیسرلیگی تورکییه نماینده‌سی کاترینا لومپ ایسه دونیا میقیاسین‌دا سیغیینماچیلارا یؤنه‌لیک آماری معلوماتلاری پایلاشاراق، سیغینماچی اوشاقلارین یوزده ۶۱ینین ابتدایی اوخولا گئتدیگینی، گنجلرین ده یوزده ۲۳ونون اورتا اؤیرتیمه داوام ائتدیگینی و یوکسک تحصیل‌ده بو رقمین یالنیز یوزده بیر اولدوغونا دقت چکدی.

لومپ، تورکییه‌ده گئچیجی قوروما آلتینا اولانلارین تحصیل وضعیتینین یاخشی سویه‌ده اولدوغونو بیلدیردی.



ایلگیلی‌لی خبرلر