آذربایجان تورکجهسینده 8 فیلم تورکیه فستیوالیندا
علیرضا سلمان پورون "کوزمک"، رضا جمالینین "کؤرپو"، لیلا احدینین "شمعدانی قیشی"، سیامک آتانین "شفق"، لیلا نوروزینین "من عصمتم"، ارتوران نجفینین "سس"...
بو ایل ایلک دفعه، مالاتیا فیلم فستیوالیندا آذربایجان تورکجهسینده 8 فیلم نوماییش ائتدیریلهجک.
علیرضا سلمان پورون "کوزمک"، رضا جمالینین "کؤرپو"، لیلا احدینین "شمعدانی قیشی"، سیامک آتانین "شفق"، لیلا نوروزینین "من عصمتم"، ارتوران نجفینین "سس"، هایده مرادینین "قارلی داملار" و حسین اصل عبداللهینین "باشلانغیجدا اؤلوم" سینما فیلملری آذربایجان تورکجهسینده 7.جی مالاتیا اولوسلارآراسی فیلم فستیوالیندا نوماییش اولوناجاق.
9-16 نوامبر تاریخلری آراسیندا مالاتیا شهر بلدیهسی طرفیندن 7.جی مالاتیا اولوسلارآراسی فیلم فستیوالی کئچیریلهجک. بو ایلکی یئنیلیکلر چرچیوهسینده مالاتیا، فستیوالا بیر آی قالمیش اؤنملی بیر سمپوزیوما ائو صاحبلیگی ائدیب. تورک سینماسیندا یئرلی کودلار سمپوزیوموندا 20 دانیشماچینین ایشتیراکی ایله 5 ایجلاس کئچیریلدی.
سمپوزیومون آچیلیشیندا مالاتیا اولوسلارآراسی فیلم فستیوالینین باشقانی و شهر بلدیه باشقانی احمد چاخیر، معاوینلری، فستیوالین مودورو سوات کؤچر، این اؤنو اونیورسیتهسینین رئیس معاوینی پروفسور نصرت آکپولات، آک پارتیا مالاتیا باشقان یاردیمچیسی محمود اؤنر اؤزر، یازیچی رضا اویلوم، سینما صنعتیله باغلی صنعتکار و سینماسئورلر ایشتیراک ائدیب.
سمپوزیومدا 100 ایلی گئریده قویان "تورکیه سینماسینین یئرلی دگرلرینی"، "یئرلیلیک، یا اونیورساللیق"، "اؤتن عصرین 50.جی ایللرینین پانوراماسی"، "یئشیلچام استودیوسیندا معنوی آختاریشلار"، "کمال طاهری اوخوماق - تورکیهنین بیر دؤورونو اوخوماقدیر"، "خالد رفیق و میللی سینما مباریزهسی"، "نظریه و پراکتیک آراسیندا"، "تورکیه سینماسیندا قورومسال پارچالانما"، "تورکیه سینما نظریهسینه دایر کیفایت قدر ایش گؤرولممهسی". "تورکیه سینماسیندا عایشه شاسا نومونهسی"، "سینمادا یئنی فورما و عنعنوی صنعتلرین عکس اولونماسی"، "60.جی ایللرین یئرلیلیک آنلاییشی"، "90.جی ایللردن سونرا تورکیه سینماسی"، "حومهیه ایچریدن باخماق: احمد اولوچای سینماسی"، "خالق ادبیاتی و داستان عنعنهسینین تورکیه سینماسیندا لازیمی عکس اولونماماسی"، "یئنی تورکیه سینماسیندا یئرلیلیک" قونولاری موذاکیره اولوندو.
مالاتیا اولوسلارآراسی فیلم فستیوالینین مودورو س.کؤچر 9-16 نوامبر تاریخلری آراسیندا کئچیریلهجک فستیوالدا سینماسئورلری چوخ موهوم سورپریزلرین گؤزلدیگینی بیلدیریب: "بیر بیریندن دیرلی سینماتوگرافچیلار مالاتیادا بیر آرایا گلهجک".
قئید ائدک کی، رضا اویلوم و یؤنهتمن رضا سیامینین بیرگه تشکیلاتچیلیغی ایله بو ایل ایلک دفعه، مالاتیا فیلم فستیوالیندا آذربایجان تورکجهسینده 8 فیلم نوماییش ائتدیریلهجک.