ماجاریستاندا تحصیل قونوسوندا قبول اولان قانونا آمریکا و آوروپا اعتراضی
یئنی قانونا گؤره، آوروپا بیرلیگی عضوو بیر اؤلکهیه باغلی اولمایان خاریجی اونیورسیتهلرین ماجاریستاندا فعالیت گؤستره بیلمهسی اوچون سؤز موضوعسو اونیورسیتهنین باغلی اولدوغو اؤلکه و ماجاریستان حکومتی آراسیندا موقاویله ایمضالانماسی لازیم اولاجاق
ماجاریستان مجلیسی، اؤلکهده، خاریجی اؤلکه دیپلومو وئرن عالی تحصیل موسسیسهلرینین فعالیتینی چتینلشدیرن بیر قانونو دونن قبول ائتدی.
یئنی قانونا گؤره، آوروپا بیرلیگی عضوو بیر اؤلکهیه باغلی اولمایان خاریجی اونیورسیتهلرین ماجاریستاندا فعالیت گؤستره بیلمهسی اوچون سؤز موضوعسو اونیورسیتهنین باغلی اولدوغو اؤلکه و ماجاریستان حکومتی آراسیندا موقاویله ایمضالانماسی لازیم اولاجاق.
موخالیفت، حکومتین حقوقی دوزنلمه ایله ماجار اصللی آمریکالی ایش آدامی جورج سوروسون مالیهیه ائتدیگی، اؤلکهدکی ان پرستیژلی اونیورسیتهلردن اورتا آوروپا اونیورسیتهسینین (CEU) ایشینی غیری-مومکون حالا گتیرمگی مقصد قویدوغونو ادعا ائدیر.
قانونو آمریکا و آلمانیا دا تنقید ائتدی.
آمریکانین بوداپشت سفیرلیگیندن ماجار خبر آژانسینا ائدیلن آچیقلامادا، آمریکانین گلهجکده ده اورتا آوروپا اونیورسیتهسینین موستقیللیگی و ماجاریستاندا پروبلمسیز بیر شکیلده فعالیت گؤستره بیلمهسی اوچون یانیندا دایاناجاغی ایفاده ائدیلدی.
اورتا آوروپا اونیورسیتهنین 26 ایلدیر آمریکا-ماجاریستان علاقهلری اوچون اهمیتلی آددیملار آتدیغی ساوونولان آچیقلامادا، اورتا آوروپا اونیورسیتهسینی هدف آلان قانونون ماجاریستان پارلامنتینده سرعتلی بیر شکیلده قبول ائدیلمهسینین آمریکانی خیال قیریقلیغینا اوغراتدیغی ایفاده ائدیلدی.
آلمانیا پرزیدنتی فرانک والتر اشتاین مایر ایسه آوروپا پارلامنتی عمومی قورولوندا ائتدیگی دانیشمادا، موضوعیلا باغلی اولاراق آوروپادا هر جور موضوع حاقیندا مذاکیره یاشانا بیلهجگینی اما آزادلیق، دموکراسی، حقوقی دولت و اینسان حاقلاری کیمی دگرلرین مذاکیره موضوعسو اولا بیلمیهجگی دئیه بیلدیرمیشدیر.
اشتاین مایر، "بو آن بوداپشتده اورتا آوروپا اونیورسیتهسینه یا قارشی ائدیلدیگی کیمی سیویل توپلومو و یا علمی نفسسیز بوراخماغا یؤنوندکی آددیملارا آوروپا سسسیز قالا بیلمز. ' ایفادهسینی ایستیفاده ائتدی.
ماجاریستان خاریجی ایشلر و خاریجی تیجارت ناظیرلیگی، اؤلکهده یوکسک تحصیل موسسیسهلری حاقیندا قبول ائدیلن قانونو تنقید ائدن آمریکا و آلمانیایا اخطار وئردی.
باخانلیقدان ائدیلن آچیقلامادا، ماجاریستاندا فعالیت گؤسترن بوتون تحصیل موسسیسهلرینین اؤلکهدکی قانونلارا اویغون گلمهسی لازیم اولدوغو وورغولاناراق،
' قبول ائدیلن قانونون هدفی تامامیله بو. بونو رد ائدن بوتون یاناشمالار سهو. بونا گؤره هم آمریکا، هم ده آلمانیانین مصلحاتگذارلاری ناظیرلیگه چاغیریلدی. ' ایفادهلرینه یئر وئریلدی.
ماجاریستان باش ناظیری ویکتور اوربان، جمعه گونو دولت رادیوسونداکی هفتهلیک چیخیشیندا،
"تحصیل ناظیرلیگی طرفیندن ائدیلن آراشدیرمایا گؤره، بیر چوخ بین الخالق اونیورسیته قانونلاری پوزور. بونا سوروسون اونیورسیتهسی ده داخیل. کیم ایشلرسه ایشلهسین ساختاکارلیق، ساختاکارلیقدیر. خاریجی دیپلوم وئرن 'سوروس اونیورسیتهسی، خاریجده تحصیل وئرمدیگینی قبول ائتدی. بو ماجار حقوقونا ترس. " دئمیشدی.
اورتا آوروپا اونیورسیتهسینین تحصیل فعالیتلرینه داوام ائده بیلمهسی اوچون ماجاریستان و آمریکا حکومتلری آراسیندا سازیش ایمضالانماسی لازیم اولدوغونا ایشاره ائدن اوربان،
"سوروس اونیورسیتهسینین گلهجگی، آمریکان-ماجاریستان حکومتلری آراسینداکی دانیشیقلارا باغلی." قیمتلندیرمهسی ائتمیشدی.
ماجاریستان حکومتی، سوروس طرفیندن دستکلنن سیویل تشکیلاتلارینین، سوروس و بین الخالق سرمایهنین ماراقلارینی محلی حکومتلره دیکته ائتدیرمک اوچون ایستیفاده ائدیلدیگینی ادعا ائدیر.
سؤز موضوعسو سیویل توپلوم تشکیلاتلاری ایسه ماجاریستانین ایزلدیگی سیغینماجی سیاستینی تنقید ائدنلری و اؤلکهدکی یولسوزلوکلاری گون اوزونه چیخارمالاری اوزوندن ماجار حکومتی طرفیندن هدف گؤستریلدیکلرینی ساوونور.