ایران‌دا تورک دیلینده یئنی صحیفه آچان شهریاری رحمت ایله یاد ائدیریک!
بوگون شهریور آیی‌نین 27-سی شهریارین وفاتینین 36-نجی ایل‌دؤنومودور
سید محمدحسین بهجت تبریزی (شهریار) ۱۲۸۵ گونش ایلینده بوستان آوانین خشگناب (خوشگه نوو) کندینده آنادان اولدو.
شهریار آذربایجان تورکجه‌سینده و فارس دیلینده بویوک اثرلر یارادیب.
آتاسی حاج میر آقا خشگنابی و آناسی خانم نه‌نه دیر.
شهریارین آنادان اولدوغو ایل‌لرده، تبریز و باشقا آذربایجان یئرلری چتین بیر دورومدا یاشاییردیلار. آغیر دونیا موحاربه‌لری و آذربایجانین باشینا یاغان خسته‌لیق کیمی دیگر بلالار، او ایل‌لر مین‌لرجه آذربايجانلی‌نی یوردونو ترک ائتمه‌یه مجبور ائتدی.
محمد حسین بهجت تبریزی بئله بیر دورومدا عاییله‌سی‌له تبریزدن خشگناب کندینه کؤچوب و اورادا اوشاقلیق گونلرین سووماغا مجبور قالیر. آنجاق بۇ اوشاقلیق گونلری اونون یارادیجیلیغینا بؤیوک تمل اولور و ایل‌لر سونرا اونون ایزی شهریار آدلی بیر شاعیر اثرلرینده آیدینجا گؤرونور.
تهران‌دا یاشادیغی گونلرده ابوالحسن خان شیدا، شمس العلما، ملک الشعرا بهار، محمد علی ترقی، فرخی یزدی، عشقی، صادق هدایت، رضاخان هندی، درویش، نیما، سالار معتمد، کمال‌الملک، حبیب سماعی و اونلارجا باشقا آدلیم صنعت‌کارلار جمعینده، بهجت شاعیر، شهریار شاعیره آد دئیشیر آنجاق دوغروسو هله‌ده بیر اؤزللیک و یئنیلیک اورتایا قویمامیشدی.
تبریزده راهنمایی دؤره‌نی باشا وئردیقدن سونرا ۱۳۰۰-جو ایلده تهرانا گئتدی و ۱۳۰۳-جو ایله قدر دارالفنون مکتبینده، سونرا ایسه طیب ساحه‌سینده تحصیلینی داوام ائتدیردی.
تهران‌دا طیب تحصیلی آلماغا باشلایاندا شهریار عبدالله امیرطهماسبی‌نین قیزی ثریایا عاشیق اولور و اونلار بیر نئچه ایل بیر-بیرلری ایله نیشانلانیرلار. آما ثریا امیر اکرم عنوان ایله تانینان چراغ علی سالار حشمت ایله ائولنیر.
بو ندنله شهریار دوکتورلوق درجه‌سی آلمادان تحصیلینی یاریمچیق قویور.
شهیارین ایلک شعر کیتابی ۱۳۰۸-جی ایلده شهیارین یاخین دوستو ابوالقاسم شیوانین سعیی ایله نشر اولونوب.
حیدربابایه سلام، تورکجه دیوانی کلیاتی و فارسجا کلیات شهریارین ان اؤنملی اثرلریدیر.
شهریارین تورکجه شعرلری، خوصوصیله مشهور «حیدربابایا سلام» شعری اونا بین الخلق شؤهرت قازاندیریب.
شهریارین تورکجه شعرلری بیر نئچه خاریجی دیله ترجمه اولونوب.
شهریار عراقدا، تورکیه‌ده، آذربایجان‌دا، اورتا آسییا اؤلکه‌لرینده، روسیه‌ده و بعضی بالکان اؤلکه‌لرینده دیگر ایرانلی شاعرلردن داها چوخ تانینیر.
شهریارین آرازین قوزئیینده، قافقازدا، آنادولودا و تورکیه‌ده یاشایان قوهوملارینا اولان سئوگیسی "ایستانبولا خیالی سفر" کیمی بعضی شعرلرینده گؤزل بیر شکیلده ایفاده اولوب و اونون تورکجه شعرلرینین باشقا بیر خوصوصیتیدیر.
شهریار "ایستانبولا خیالی سفر" شعرینده بئله دئییر:
گلمیشم «نازلی هیلال» اؤلکه سینه
«فکرت»ین، اینجه خیال اؤلکه سینه
«عاکف»ین مارشی، یاشاردیب گؤزومو
باخیرام «یحیی کمال» اؤلکه سینه»
شهریار ۱۳۶۷ گونش ایلینده اؤلدو و اؤز وصیتینه گؤره تبریزین مقبرةالشعرا مزارلیقیندا قویلاندی.
شهریار ایستانبول تورپاغینی موقدس حئساب ائده‌رک دئییر:
«هر یئرین توپراغی بیر شئی به‌سلر
بورادا داشدان چوخ ایگیت‌لر سوموگو
چشمه دن چوخلو، شهیدلر قانی‌دیر»
