هیمالیا بوزلاقلاریندا ۱۷۰۰ اسکی ویروس چئشیدی تاپیلدی

هیمالیا داغلاریندا تیبئت یایلاسینداکی قولیا بوزلاقیندا آپاریلان آراشدیرمادا چوخو اوللر معلوم اولمایان ۱۷۰۰-دن چوخ ویروس چئشیدی تاپیلدی.

بو ویروسلارین تخمینا ۴۱ مین ایلدیر دونموش تورپاقدا گیزلندیغی معین ائدیلمیشدیر. گلوبال ایستیلشمه نتیجه‌سینده بو ویروسلارین اریییب اینسانلار اوچون تهلوکه یارادابیلجه‌یی ایله باغلی ناراحاتلیق بیلیم دونیاسیندا موذاکیره اولونماغا باشلاییب.

آراشدیرماجیلار بیلدیریرلر کی، بو ویروسلارین بؤیوک چوخونلوغو اینسانلارا دئییل، باکتئری‌لری یولوخور. تدقیقات زامانی ویروسلارین موختلیف ایقلیم شرایطینه نئجه تپکی وئردیگی و اونلارین زامانلا دَییشمه‌سی آراشدیریلیب. بو آراشدیرما ویروسلارین کئچمیش ایقلیم دَییشیکلیکلرینه نئجه اویغونلاشدیغینا دایر ارنملی بیلگیلر وئریر.

اوهایو دؤلت اونیوئرسیته‌سیندن آراشدیرمانین باش مولیفی زهیپینگ زهونگ وورغولادی کی، بو تدقیقاتلار داوام ائدن گلوبال ایقلیم دَییشیکلیگی باغلامیندا ویرال آداپتاسیون آنلاییشیمیزی یاخشیلاشدیرابیلر. آراشدیرما ایقلیم دَییشیکلیگی ایله ویروس اینکیشافی آراسینداکی علاقه‌یه، خوصوصا‌ ده سون بوز دؤورونون سونا چاتدیغی ۱۱.۵۰۰ ایل اوله عائید ویروس گلیشیمنه دقت چکیر.

اوزمانلار دونموش تورپاقدا تاپیلان بو ویروسلارین پاندئمی‌یه سبب اولما پوتانسیلینین آشاغی اولدوغونو بیلدیرسه‌لر ده، کؤهنه ویروسلارین یئنیدن اورتایا چیخماسیندان چوخ، یئنی ویروسلارین تکامولونون داها چوخ ناراحاتلیق قایناغی اولدوغونو بیلدیریرلر.