کوئینزلندده سئل فلاکتی: "اینانیلماز" داغینتیلار و کسکین الکتریک کسینتیلری
کوئینزلند ایالتینین باشچیسی دیوید کریسافولی، شدتلی یاغیشلارین یاراتدیغی سئل فلاکتینین بؤلگهده جدی داغینتیلارا سبب اولدوغونو بیلدیردی.

استرالیانین کوئینزلند ایالتینین باشچیسی دیوید کریسافولی، شدتلی یاغیشلارین یاراتدیغی و ایکی نفرین حیاتینی ایتیردیگی سئل فلاکتی نتیجهسینده بؤلگهده یارانان داغینتینین "اینانیلماز" سویهده اولدوغونو بیلدیردی.
ایبیسی نیوزون خبرینه گؤره، کوئینزلند ایالتینین باشچیسی کریسافولی، ایالتین شیمالیندا باش وئرن سئل حادثهلری ایله باغلی آچیقلاما وئردی.
کریسافولی بیلدیریب کی، شدتلی یاغیشلارین یاراتدیغی سئللر سببیندن تخلیه ائدیلن مینلرله اینسان ائولرینه قاییتماغا باشلاییب و بؤلگهده یارانان داغینتی "اینانیلماز" درجهدهدیر. او، "اینسانلارین ایرادهسینی سینایاجاق بیر فلاکت" کیمی خاراکتئریزه ائتدیگی سئل حادثهلری نتیجهسینده تخمینا 10 مین ائوده الکتریک انرژیسینین کسیلدیگینی قئید ائتدی.
کریسافولی، ایالتین شیمالیندا یئرلشن تاونسویل شهرینین سئل سببیندن ان ریسکلی اراضیلردن بیری اولدوغونو بیلدیرهرک، بؤلگهنین تهلوکهنی "اوجوز آتلاتتیغینی" وورغولادی. کوئینزلندین اینگهام بؤلگهسی پولیس قوهلری ایسه سئل حادثهسینده ایکی نفرین حیاتینی ایتیردیگینی خبر وئردی. یئرلی صلاحیتلیلر ایسه یوزلرله ائو و ایش یئرینین زیان گؤردوگونو بیلدیریر.