امریکانین روسیا و چینه قارشی یئنی تحریم قراری
امریکا مالیه ناظیرلیگی روسیانین مالیه، ساوونما و انرژی سئکتورلاریندان 100-ا یاخین هدفه قارشی تحریم لری یئنیدن اعلان ائدیب.

امریکا مالیه ناظیرلیگی روسیانین مالیه، ساوونما و انرژی سئکتورلاریندان 100-ا یاخین هدفه قارشی تحریم لری یئنیدن اعلان ائدیب.
ناظیرلیک آچیقلاماسیندا بیلدیریب کی، حساس ماللار اوچون اؤدنیشلری آسانلاشدیرماق اوچون روسیا و چیندهکی آکتیورلار آراسیندا قورولموش تحریم لردن یایینما پلانی اوزره تدبیر گؤرولوب.
بو چرچیوهده سؤزوگئدن پلانا داخیل اولان روسیادان 6 قوروم و 1 نفر، چیندن ایسه 9 قوروم تحریم سیاهیسینا سالینیب.
آچیقلامادا همچنین روسیا رسمی لری ایله کووردیناسیون آپاران قیرغیزیستاندا یئرلشن مالیه قورومو کرمت بانکین (Keremet) و امریکانین تحریم لردن یان کئچمهسی اوچون تحریم تطبیق ائتدیگی بیر بانکین دا هدفه آلیندیغی و حاضیردا تحریم آلتیندا اولان 100-ا یاخین قورومون، روسیانین مالیه، ساوونما و انرژی سئکتورلارینداکی عملیاتلاری آسانلاشدیردیقلارینا گؤره یئنیدن سیاهییا آلیندیغی قئید ائدیلیب.
آچیقلامادا وورغولانیر کی، یئنی تحریم تطبیق ائدیلمیش قوروملاردان هر هانسی بیری اوچون و یا اونلارین آدیندان بیلهرکدن اهمیتلی عملیاتلاردا آراجیلیق ائدن خاریجی شخصلر مجبوری ایکینجی درجهلی تحریم لره معروض قالا بیلرلر.
امریکا خاریجی ایشلر ناظیرلیگینین همچنین روسیانین موختلیف ساوونما صنایعسی شیرکتلری و حربی صنایع پایگاهینی دستکلهینلر ده داخیل اولماقلا 150-دن چوخ قوروم و شخصه قارشی تحریم تطبیق ائتدیگی بیلدیریلن آچیقلامادا بوگونکو تحریم لرین روسیانین امریکادان یایینما سعیلرینی دستکلمهیه داوام ائدن، باشدا چین اولماقلا، بیر چوخ اؤلکهدن شیرکتلری احاته ائتدیگی ایفاده ائدیلیب.
آچیقلامادا قیمتلندیرمهلری یئر آلان امریکا مالیه ناظیرینین معاوینی والی آدیمو حاضیردا آتیلان آددیملارین روسیانین امریکا تحریم لرینی پوزماسینا و اوکرایناداکی محاربه اوچون سلاح تولید ائتمک اوچون لازیم اولان ماللارا چاتماسینا مانع اولدوغونو وورغولاییب.
والی آدیمو قئید ائدیب کی، ایکینجی درجهلی تحریم لرین گئنیشلندیریلمهسی روسیانین گلیر و ماللارا چیخیش ایمکانلارینی آزالداجاق.