بایدن: غزهده آتیشکس اعلان ائدیلمهسینه چوخ یاخینیق
بایدن غزهده تئزلیکله آتیشکس راضیلاشماسینین الده اولوناجاغینا ایناندیغینی وورغولایاراق، "آیلار اؤنجه ایرلی سورولن آتیشکس تکلیفینین نهایت رئاللاشماسینا چوخ یاخینیق" دئدی.

آمریکا پرئزیدئنتی جو بایدن غزهده تئزلیکله آتیشکس راضیلاشماسینین الده اولوناجاغینا ایناندیغینی وورغولایاراق، "آیلار اؤنجه ایرلی سورولن آتیشکس تکلیفینین نهایت رئاللاشماسینا چوخ یاخینیق" دئدی.
دؤرد ایللیک پرئزیدئنتلیگی دؤورونده خاریجی سیاستینی شرح ائتدیگی چیخیشیندا جو بایدن یاخین شرق و غزه ایله باغلی دا قیمتلندیرمهلر ائدیب.
بایدن، کئچن یای ایجتیماعیته آچیقلادیغی آتیشکس تکلیفی اوزرینده آیلارلا ایشلدیکدن سونرا، ایندی بیر نتیجهیه چوخ یاخین اولدوقلارینی قئید ائدرک، "ایجازه وئرین، ایسرائیل و حماس آراسینداکی محاربه حاقیندا بونو دئییم؛ نهایت کی، حیاتا کئچیرمهیه چوخ یاخینیق. آیلار اؤنجه ایرلی سورولن آتیشکس تکلیفی» دئدی.
ایسرائیلین باش ناظیر بنیامین نئتانیاهو، قطر امیری شئیخ تمیم بن حمد آل ثانی و میصر پرئزیدئنتی عبدالفتاح السیسی ایله آنملی گؤروشمهلر کئچیردیگینی ایفاده ائدن بایدن، «بو راضیلاشمانی تاماملاماق اوچون چوخ چالیشیرام» دئدی.
آتیشکس راضیلاشماسینین یئرینه یئتیریلهجکی تقدیرده اسیرلرین آزاد ائدیلهجگینی، قارشیدورمالارین دایاناجاغینی و غزهیه اینسانی یاردیملارین چاتدیریلاجاغینی بیلدیرن جو بایدن بو جور قیمتلندیرمهنی ائدیب:
"محاربه باشلایاندان بری دهشتلی اذیت چکن فیلیسطینلیلره اینسانی یاردیمی اهمیتلی درجهده آرتیرماق مومکون اولاجاق. فیلیسطینلیلر جهنمی یاشاییبلار. چوخ سایدا گوناهسیز اینسان هلاک اولوب. فیلیسطین خالقی باریشه و قرار وئرمک حقوقونا لاییقدیر. ایسرائیل ده باریشه و رئال تهلوکهسیزلیگه لاییقدیر».
آمریکانین میللی تهلوکهسیزلیک موشاویری ژاک سولیوان ده غزهده آتیشکسه چوخ یاخین اولدوقلارینی و راضیلاشمانین بو هفته الده ائدیلهبیلهجگینی آچیقلاییب.
سولیوان دئییب: "بیز آتیشکس راضیلاشماسینا چوخ یاخینیق، بو هفته تاماملانا بیلر. من هئچ بیر وعده و یا تخمین ده وئرمیرم، لاکین بونون رئاللاشماسی اوچون چالیشاجاغیق."