امریکادان اوکراینایا 500 میلیون دولارلیق یئنی تهلوکهسیزلیک یاردیمی
جو بایدن رهبرلیگی اوکراینانین مدافعهسینی گوجلندیرمک اوچون نؤوبتی بؤیوک یاردیم پاکتینی اعلان ائتدی.
امریکادا جو بایدن رهبرلیگی، اوکراینایا 500 میلیون دولار دگرینده یئنی بیر تهلوکهسیزلیک یاردیمی ائدجگینی آچیقلادی.
امریکا ساوونما ناظیرلیگی (پنتاگون) سؤزچوسونون یایدیغی یازیلی آچیقلامادا بیلدیریلیر کی، اوکراینانین کریتیک تهلوکهسیزلیک و مدافعه احتیاجلارینی قارشیلاماق اوچون آیریلان بو دستک هاوا هوجوموندان ساوونما راکئتلری، هاوادان-قورویا مهمات لار و اوکراینانین اف-16 لارینین ایستیفادهسینی دستکلهیهجک آوادانلیقلاری احاته ائدیر.
دگری تخمینا 500 میلیون دولار اولان بو یاردیم پاکئتینه AIM-7, RIM-7 و AIM-9M هاوا هوجوموندان ساوونما راکئتلری، هاوادان-قورویا مهمات لار، اف-16-لار اوچون دستک آوادانلیقلاری، همچنین ارتباطات و نقلیات لوازیماتلاری داخیل اولدوغو آچیقلانیب.
آچیقلامادا او دا وورغولانیب کی، بو پاکئت، بایدن رهبرلیگینین آوقوست 2021-جی ایلدن بری اوکراینایا ساوونما ناظیرلیگینین اینوانتریندن آییردیغی 74-جو یاردیم دیلیمیدیر.
دیگر طرفدن، بؤیوک بریتانیا و لتونی رهبرلیک ائتدیگی اولوسلار آراسی کوالیسیون چرچیوهسینده اوکراینایا 30 مین یئنی اینسانسیز هاوا آراجینین گؤندریلهجگی بیلدیریلیب.
بؤیوک بریتانیا ساوونما ناظیرلیگینین آچیقلاماسینا اساساً، لتونی و بریتانیانین اورتاق شکیلده حیاتا کئچیردیگی اولوسلار آراسی خالق درون کوالیسیونو طرفیندن 45 میلیون پوند دگرینده اوکراینایا 30 مین اینسانسیز هاوا آراجی تداروک ائدیلهجک.
آچیقلامادا قئید اولونوب کی، بو اینسانسیز هاوا آراج لارینین مالیه لشدیریلمهسی بؤیوک بریتانیا، دانیمارکا، هلند، لتونی و سوئد کیمی اؤلکهلرین کمک لری ایله تامین ائدیلهجک.
همچنین، بؤیوک بریتانیانین رهبرلیک ائتدیگی "اوکراینا اوچون اولوسلار آراسی" فوندون عمومی حجمینین متفیقلرین یئنی دستکی ایله 1،3 میلیار پوندی کئچدیگی، پورتوقالیا و آلمانیانین ایسه یئنی مالیه دستکی چرچیوهسینده فونا ایلک دفعه قاتیلدیغی خصوصی قئید اولونوب.
