بلینکن تورکیهیه گلیر
آنتونی بلینکن سوریهدکی سون حادثهلری و غزهده مومکون آتیشکس پروسهسی ایله باغلی وضعیتی موذاکیره ائتمک اوچون بو گون تورکیهیه گلهجک.
آمریکا دیش ایشلر باخانی آنتونی بلینکن سوریهدکی سون حادثهلری و غزهده مومکون آتیشکس پروسهسی ایله باغلی وضعیتی موذاکیره ائتمک اوچون بو گون تورکیهیه گلهجک.
آمریکا دیش ایشلر باخانیندان وئریلن آچیقلامایا گؤره، آنتونی بلینکن اوردونون عقبه شهریندن سونرا گلهجگی پایتاخت آنکارادا دانیشیقلار آپاراجاق.
بلینکنین گوندهمینده سوریهده بشار اسد رئژیمینین دئوریلمهسیندن سونرا بازار گونو باشلایان کئچید پروسهسی تلاشلاری و ۱۴ آیدیر ایسرائیلین سالدیریلاری آلتیندا اولان غزهده مومکون آتیشکس راضیلاشماسی یئر آلاجاق.
آچیقلامادا، «دیش ایشلر باخانی بلینکن ناتو-نون دگرلی موتتفیقی اولان تورکیهده یوکسک وظیفهلی مقاملارلا گؤروشهجک و تروریزمله موباریزهدن توتموش بؤلگهسل ثابتلیگه قدر اورتاق اؤنجه لیکلر اوزره داوام ائدن ایکیطرفلی امکداشلیغی موذاکیره ائدجک» بیلدیریلیر.
آچیقلامایا گؤره، بلینکن تورکیه و اوردون ایله تماسلاری زامانی «آمریکانین حساب وئرهبیلیرلیک و تمثیل ائدن سوریه حکومتینه کئچید پروسهسینه دستگینی» تکرارلایاجاق.
بلینکن عینی زاماندا بو کئچید دؤورونده آمریکانین سوریهنین قونشولارینا دستگینی وورغولایاجاق و بؤلگهدهکی کؤچکون سوریهلیلرین احتیاجلارینین اؤدنیلمهسی ایله باغلی مسئلهلری موذاکیره ائدجک.
آمریکا ناظیرینین دیگر اؤنملی مؤوضوعسو غزهده مومکون آتیشکس پروسهسی و بونونلا باغلی محبوسلارین آزاد ائدیلمهسی و غزهیه داها چوخ اینسانی یاردیمین داخیل اولماسی اولاجاق.
