پئنتاگونون سوریهدکی مؤوجودلوغو ایله باغلی آچیقلاماسی
پئنتاگون سوریهنین شرقینده نیظامی مؤوجودلوغونو داوام ائتدیرجگینی آچیقلاییب.
آمریکا ساوونما ناظیرلیگی (پئنتاگون) سوریهنین شرقینده نیظامی مؤوجودلوغونو داوام ائتدیرجگینی آچیقلاییب.
آمریکا ساوونما ناظیرینین یاخین شرق اوزره موعاوینی دانیئل شاپیرو ترور تشکیلاتی داعشین دیرچلمهسینین قارشیسینی آلماق اوچون سوریهنین شرقیندهکی نیظامی وارلیقلارینین داوام ائدجگینی بیلدیریب.
ماناما دیالوگ تهلوکهسیزلیک کونفرانسیندا آچیقلاما وئرن شاپیرو، "بیز سوریهنین شرقیندهکی وارلیغیمیزی داوام ائتدیرجگیک و بو، یالنیز داعشین دایمی مغلوبیتینی تامین ائتمک اوچوندور" دئدی.
بو آرادا آمریکا مرکزی قوموتانلیغی (سنتکام) سوریهده داعش ترور تشکیلاتینا عایید اولدوغو بیلینن دوشرگهلری ووردوغونو آچیقلاییب.
سنتکام ایکس سوسیال مئدیا حسابیندان سوریهدکی فعالیتلری ایله باغلی آچیقلاما وئریب.
آچیقلامادا سوریهنین مرکزی بؤلگهلرینده داعشه عایید اولدوغو بیلینن بؤلگهلره هاوا ضربهلری ائندیریلدیگی بیلدیریلیب.
آچیقلامادا آمریکا نیظامی هاوا قوهلرینه عایید موختلیف اوچاقلار واسطهسیله ۷۵-دن چوخ هدفین وورولدوغو، ضررین قیمتلندیریلمهسی ایشلرینین داوام ائتدیگی و سیویل ایتکیلرین اولمادیغی بیلدیریلیب.
آچیقلامادا سالدیریلارین سوریهدکی مؤوجود وضعیتدن ایستیفاده ائدرک داعش-ین یئنیدن ایستروکتورلاشماسینین قارشیسینی آلماق مقصدیله حیاتا کئچیریلدیگی بیلدیریلیب.
نویابرین ۲۷-ده سوریهده رئژیم قوهلری ایله موخالیف سیلاحلی قروپلار آراسیندا توققوشمالار شیددتلنیب.
دئکابرین ۷-ده پایتاخت دمشقه گیرمهیه باشلایان قروپلارا کوتلهلرین دستگی ایله رئژیم بورادا و بیر چوخ بؤلگهده نظارتی تامامیله ایتیرهرک سوقوط ائتدی.
دونن اؤلکهده بعث پارتیسینین ۶۱ ایللیک حاکمیتی سونا چاتدیغی بیر واختدا رئژیم لیدئری بشار اسد پایتاختدان قاچیب.
