بلینکن: "ایران و روسیانین دستکی اسد رژیمینی اوچوروما آپاردی"

امریکانین خاریجی ایشلر ناظیری آنتونی بلینکن، بشار اسد رژیمی‌نین 2011-جی ایلدن بری سیاسی سوره جی رد ائتمه‌سی‌نین و ایران ایله روسیانین دستکینه گوونمه‌سی‌نین رژیمین چؤکمه‌سینه سبب اولدوغونو بیلدیردی.

بلینکن، سوریه‌ده‌کی وضعیتله باغلی وئردیگی یازیلی آچیقلامادا، 14 ایللیک موناقیشه‌دن سونرا سوریه خالقی‌نین اومیدلنمه‌سی اوچون سبب‌لر یاراندیغینی وورغولادی. او، امریکانین احاته‌لی و سوریه لیلر طرفیندن حیاتا کئچیریله‌جک باریشچیل کئچید سوره جینی دستکلدیگینی بیان ائتدی.

"اسد رژیمی‌نین 2011-جی ایلدن اعتباراً اعتبارلی سیاسی سوره جی رد ائتمه‌سی و روسیانین، ایرانین غیری-اینسانی دستکی اؤز محوینی گتیردی،" - دئیه بلینکن قئید ائتدی.

بلینکن، کئچید دؤورونده سوریه خالقی‌نین دؤولت قوروم‌لاری‌نین قورونماسینی، اساس خیدمت‌لرین برپا اولونماسینی و حساس ایجما‌لارین مدافعه‌سینی طلب ائتمک حقوقونا مالیک اولدوغونو وورغولادی. امریکانین بؤلگه‌ده‌کی طرفداش‌لاری ایله یاخین‌دان امکداش‌لیق ائده‌رک اینکیشاف‌لاری ایزله‌یه‌جگینی ده دقته چاتدیردی.

امریکا خاریجی ایشلر ناظیری، اسد رژیمی‌نین و اونون دستکچی‌لری‌نین تؤرتدیک‌لری جینایت‌لره گؤره اولوسلار آراسی سویه‌ده جاواب وئرمه‌سی‌نین تامین اولوناجاغینی بیلدیردی. او، بوتون طرف‌لری اینسان حقوق‌لارینا حؤرمت ائتمه‌یه، سیویل وطنداش‌لارین مدافعه‌سینی تامین ائتمه‌یه و اولوسلار آراسی اینسانی حقوقا رعایت ائتمه‌یه چاغیردی.

سوریه رژیمی ایله موخالیف سلاحلی قروپ‌لار آراسیندا 27 نوامبردا قارشیدورما‌لار داها دا شدتلنمیشدی. 7 دسامبردا موخالیف قروپ‌لار دمشقه داخیل اولدوق‌دان سونرا گئنیش خالق دستکی ایله اسد رژیمی نظارتی تامامیله ایتیرمیش و چؤکموشدو.

دونن ایسه بعث پارتیاسی‌نین 61 ایللیک حاکمیتی سونا چاتارکن، رژیم لیدئری بشار اسد پایتاخت‌دان قاچمیشدی.