گورجوستاندا باش وئرن حادثهلرده ۲۹۸ نفر توتوخلانیلیب
گورجوستانین پایتاختی تیفلیسده داوام ائدن گؤستریلرده ۲۹۸ نفر توتوخلانیلیب، ۱۴۳ پولیس امکداشی یارالانیب.
گورجوستانین پایتاختی تیفلیسده داوام ائدن گؤستریلرده ۲۹۸ نفر ساخلانیلیب، ۱۴۳ پولیس امکداشی یارالانیب.
گورجوستان ایچ ایشلر ناظیرینین موعاوینی آلئکساندره داراخولیدزه حکومتین گورجوستانین آوروپا بیرلیگینه اویهلیگی ایله باغلی دانیشیقلاری ۲۰۲۸-جی ایله قدر دایاندیرماسینا قارشی داوام ائدن اعتراضلاردا ساخلانیلان و یارالانان پولیس امکداشلاری حاقیندا معلومات وئریب.
پارلامئنت بیناسی قارشیسیندا گونلردیر داوام ائدن گؤستریلره قاتیلان بعضی فعاللارین پولیسه قارشی زوراکیلیق تطبیق ائتدیگینی قئید ائدن داراخولیدزه، حادثهلرده ایندیدک ۱۴۳ پولیسین یارالاندیغینی بیلدیریب.
۲۹۸ نفرین ساخلانیلدیغینی دئین داراخولیدزه ایستینتاقین داوام ائتدیگینی بیلدیریب.
گورجوستانین اومبودسمانی لئوان ایوسئلیانی دونن اعلان ائدیب کی، پولیس ساخلانیلان گؤستریچیلرین اکثریتینه قارشی زوراکیلیق تطبیق ائدیب.
باش ناظیر ایراکلی کوباخیدزه نؤوبتی دفعه موخالیفتی و اونون طرفدارلارینی غیری-ثابتلیک یاراتماقدا اتهام ائدیب.
بو آرادا، حکومتین ۲۸ نویابردا آوروپا بیرلیگینه اویهلیگه دانیشیقلارینی دایاندیرما قرارینا قارشی باشلایان گؤستریلر ۶-جی گونده باشدا پایتاخت تیفلیس اولماقلا موختلیف شهرلرده داوام ائدیب.
آخشام ساعاتلاریندا یئنیدن تیفلیسده پارلامئنت بیناسی قارشیسینا توپلاشان گؤستریچیلر شوتا روستاوئلی کوچهسینی نقلیاتین حرکتی اوچون باغلاییب. پولیس اراضیده گئنیش تهلوکهسیزلیک تدبیرلری گؤروب.
اعتراضچیلارین داش، چوبوق و پارتلاییجی ماددهلرله سالدیریلارینا دفعهلرله گؤزیاشاردیجی قازلا جواب وئرن پولیس اؤزل قووتلری سو تضییقلی ماشینلارلا ساعات ۰۵:۰۰ جیواریندا (یئرلی) گؤستریچیلره موداخیله ائدیب. گؤستریچیلر گئری چکیلمهلی اولوب.
دیگر طرفدن، آنایاسا محکمهسی پرئزیدئنت سالومه زورابیشویلینین اوکتیابرین ۲۶-دا کئچیریلن پارلامئنت سئچکیلرینین نتیجهلرینه اعتراض ائدرک سئچکینین لغوی ایله باغلی قالدیردیغی ادعانی رد ائدیب.
آنایاسا محکمهسیندن وئریلن یازیلی آچیقلامادا پرئزیدئنت زورابیشویلی ایله بعضی موخالیفت پارتیلری و غیری-حکومت تشکیلاتلارینین سئچکیلرین لغوی اوچون تقدیم ائتدیگی دیلیکچهنین قبول اولونمادیغی بیلدیریلیب.
آچیقلامادا، سئچکینین نتیجهلرینین لغوی اوچون نویابرین ۱۹-دا محکمهیه تقدیم ائدیلن دیلکچهنین رد ائدیلدیگی وورغولاناراق، «قرار قطعیدیر، اعتراضا و یا باخیلمایا تابع دئییل» دئییلیب.
پرئزیدئنت زورابیشویلی بو قرارلا باغلی مطبوعات کونفرانسی کئچیرهرک، آنایاسا محکمهسینین اؤلکهنین آنایاسال قورولوشونا قاییتماق فورصتینی الدهن وئردیگینی اساس گتیرهرک، «آرتیق اؤلکهده هئچ بیر مشروع قوروم و تشکیلات قالماییب» دئییب.
اوکتیابرین ۲۶-دا گورجوستاندا کئچیریلن پارلامئنت سئچکیلرینده حاکم گورجو آرزوسو پارتیسی ۵۳,۹۳ فایز سسله قالیب گلیب.
پرئزیدئنت زورابیشویلینین دستکلدیگی موخالیفت پارتیلری حکومتی سئچکیلرده ساختاکارلیقدا اتهام ائدرک، سئچکینین نتیجهلرینی تانیمادیقلارینی بیان ائدیب و کوچه اعتراضلارینا باشلاییبلار.
گؤستریلره باخمایاراق، پارلامئنت نویابرین ۲۸-ده باش ناظیر کوباخیدزهنین یاراتدیغی یئنی کابینه اعتیماد سس وئرمهسی وئریب.
سئچکیلرین نتیجهلرینه گؤره، ۱۵۰ نفرلیک پارلامئنتده گورجو آرزوسو پارتیسینین ۸۹، موخالیفتین ایسه ۶۱ میللت وکیلی وار.
