استرالیادا ۱۶ یاشدان کیچیکلر اوچون سوسیال مئدیا قاداغاسی

دونیادا ایلک دفعه اولاراق استرالیا حؤکومتی ۱۶ یاشیندان کیچیک اوشاق و گنجلرین سوسیال مئدیادان ایستیفاده‌سینی قاداغان ائدن قانون لاییحه‌سینی قبول ائدیب.

۲۰۲۵-جی ایلین سونوندان اعتباراً گئچرلی اولاجاق قانونا اساساً، ۱۶ یاشیندان کیچیک هر کسین اؤز روح ساغلیغینی و رفاهینی قوروماق اوچون سوسیال مئدیا پلاتفورملارین‌دان ایستیفاده‌سینین قارشیسی آلیناجاق.

سوسیال مئدیا شیرکتلری ۱۶ یاشدان کیچیکلری پلاتفورملارین‌دان کناردا ساخلاماق اوچون "عاغیلا باتان آددیملار" آتماسالار، ۵۰ میلیون استرالیا دولارینا قدر جریمه‌لنه‌بیلرلر. او بیری طرفدن، قایدالاری پوزان یئنی‌یئتمه‌لر و والدینلر اوچون هئچ بیر جزا اولمایاجاق.

"مئساژلاشما پروقراملاری"، ”اونلاین اویون خیدمتلری" و "ایستیفاده‌چیلرین ساغلیغینا و تحصیلینه دسته‌ک وئرن خیدمتلر" قاداغانین احاطه دایره‌سینه داخیل ائدیلمه‌یه‌جک.

پلاتفورما داخیل اولماق اوچون ایستیفاده‌چیلرین داخیل اولماسینی طلب ائتمه‌ین یوتیوب کیمی سایتلار دا قاداغایا معروض قالمایاجاق.