بمت:"اؤلدورولن اوشاق‌لارین سایی اوچ دفعه آرتیب"

بیرلشمیش میللت‌لر تشکیلاتی (بمت) 2023-جو ایلین اوکتبرین 7-دن بری ایشغال آلتینداکی اردون چایی‌نین باتی ساحلینده اؤلدورولن اوشاق‌لارین سایی‌نین اوچ دفعه آرتدیغینی آچیقلاییب. بمت-نین سؤزچوسو استفان دوجاریک بمت-نین اینسانی مسئله‌لرین علاقه لندیریلمه‌سی اوفیسی (OCHA) و فیلیسطینلی سیغینماچیلارا کؤمک و باییندیرلیق آژانسیندان (اونروا)  آلینان معلومات‌لاری پای‌لاشا‌راق، 2023-جو ایلین اوکتبرین 7-دن بری هر هفته اورتا حسابلا 4 اوشاغین اؤلدورولدوگونو بیلدیریب. بو، 2023-جو ایلین ایلک 9 آیی ایله موقاییسه‌ده اوچ دفعه داها چوخ‌دور.

استفان دوجاریک ایشغال آلتینداکی اردون چایی‌نین باتی ساحلینده وضعیتین اوشاق‌لار اوچون خصوصیله آغیر اولدوغونو وورغولاییب. او، بؤلگه‌ده غیری-قانونی شکیلده مسکون‌لاشان‌لارین تؤرتدیگی زوراکی‌لیق‌لار سببیندن 1700 نفرین ائوینی ترک ائتدیگینی، بون‌لارین یاری‌سی‌نین اوشاق‌لار اولدوغونو قئید ائدیب.

وضعیتین تحصیله ده جدی تأثیر ائتدیگینی بیلدیرن استفان دوجاریک 2023-جو ایلین اوکتبر آیین‌دان 2024-جو ایلین می آیینا قدر بؤلگه‌ده 13 مین اوشاغین مکتبه گئده بیلمه‌دیگینی علاوه ائدیب.