نیجریهده بوکو حرام سالدیریسیندا ۵ عسگر حیاتینی ایتیریب
میللی مطبوعاتدا چیخان خبرلرده هوجومدا ۲۰ عسگرین حیاتینی ایتیردیگی ادیعا ائدیلدی

بوکو حرام تئرور تشکیلاتینین نیجریهنین بورنو ایالتینده حیاتا گئچیردیگی هوجومدا ۵ عسگر حیاتینی ایتیریب.
نیجریه مودافیعه ناظیرلیگینین مئدیا عملیاتلاری دیرئکتورو ادوارد بوبا وئردیگی آچیقلامادا بورنو ایالتینین قوبیو بؤلگهسینده ثابیتلیک عملیاتلاری و مودافیعه بؤلگهسینده یئرلشدیریلن عسگرلرین بوکو حرام طرفیندن هوجوما معروض قالدیغینی بیلدیریب.
بوبا هوجومدا ۵ عسگرین حیاتینی ایتیردیگینی، ۱۰ عسگرین یارالاندیغینی، ۴ عسگرین ایسه ایتکین دوشدویونو بیلدیریب.
عملیات زامانی چوخلو تئرورچونون ضررسیزلشدیریلدیگینی بیلدیرن بوبا، تئرورچولارین سیلاح ماشینی و موهوم تجهیزاتین دا اله گئچیریلدیگی بیلگیسینی پایلاشیب.
میللی مطبوعاتدا چیخان خبرلرده هوجومدا ۲۰ عسگرین حیاتینی ایتیردیگی ادیعا ائدیلدی.
۲۰۰۰-جی ایللرین اوللریندن نیجریهده مؤوجود اولان بوکو حرامین ۲۰۰۹-جو ایلدن بو یانا حیاتا گئچیردیگی کوتلوی تئرور آکتلاریندا اون مینلرله اینسان حیاتینی ایتیریب.
اؤلکهده باش وئرن تئرور آکتلاری و موناقیشهلر سببیندن یوز مینلرله اینسان کؤچ ائتمهلی اولوب.
بوکو حرام تئرور تشکیلاتی ۲۰۱۵-جی ایلدن بری اؤلکهنین سرحد قونشولاری کامرون، چاد و نیجرده ده هوجوملار حیاتا گئچیریر. تشکیلاتین چاد گؤلو حؤزهسیندکی هوجوملاریندا ان آز ۲ مین آدام حیاتینی ایتیردی.