بیرلشمیش میللتلر تشکیلاتی: غزه‌نین شیمالی قبیریستانلیغا چئوریلدی
لوویس واتریدگ، غزه‌نین شیمالینین ایسرائیلین سالدیریلاری آلتین‌دا "قبیریستانلیغا چئوریلدیگینی" سؤیله‌دی
بیرلشمیش میللتلر تشکیلاتینین (بمت) یاخین شرق‌ده‌کی فیلیسطین‌لی قاچقینلارا یاردیم و ایشلر اوزره آژانسینین (آنروا) ایرتیباطلار اوزره باش متخصصی لوویس واتریدگ، غزه‌نین شیمالینین ایسرائیلین سالدیریلاری آلتین‌دا "قبیریستانلیغا چئوریلدیگینی" سؤیله‌دی.
واتریدگ اؤزونون ایکس سوسیال مئدیا حسابین‌دا غزه‌نین شیمالین‌داکی داغینتیلاری عکس ائتدیر‌ن قیسا ویدئو پایلاشیب.
ویدئودا یول بویو سالدیریلار نتیجه‌سین‌ده داغی‌دیلان و داغینتی قالاقلارینا چئوریلن یاشاییش منطقه‌لری دقت چکیر.
غزه‌نین شیمالین‌داکی آغیر داغینتیلاری اورتایا قویان ویدئو ایله پایلاشدیغی مئساژدا واتریدگ، "غزه‌نین شیمالین‌دا داغینتیلارین هارادا باشلاییب، هارادا بیتدیگینی تصویر ائتمک اوچون هئچ بیر یول یوخ‌دور" دئدی.
واتریدگ دئییب: "شهرده‌کی داغینتیلارین میقیاسی ایله باغلی غزه شهرینه هانسی ایستیقامت‌ده گیرسه‌نیز ده، ائولر، خسته‌خانالار، مکتبلر، ساغلیق مرکزلری، مسجیدلر، منزیللر، رستورانلار - هامیسی داغیدیلیب. ایندی بوتون چئوره قبیریستانلیغا چئوریلیب."
بیرلشمیش میللتلر تشکیلاتینین اینسان حاقلاری ایداره‌سی ده 2023-جو ایلین نویابرین‌دان 2024-جو ایلین آپرئلینه قدر غزه‌ده سیویل اینسانلارین اؤلدورولمه‌سی و بین الخالق حقوقون پوزولماسی ایله باغلی راپورونو پایلاشیب کی، بو دا ساواش جینایتی ساییلا بیلر.
قاتیل ایسرائیلین آغیر سالدیریلارینا معروض قالان غزه‌ده اؤلدوروله‌نلرین تخمیناً 70 فایزینین قادین و اوشاقلار اولدوغونو بیل‌دیر‌ن اوفیس، غزه‌ده تؤره‌دیلن دهشت‌لی پوزونتولارا و مومکون وحشی جینایتلره گؤره "حساب وئرمه‌لی‌دیر" چاغریسی ائدیب.
ایسرائیلین 7 اوکتیابردان بری غزه زولاغینا تشکیل ائتدیگی سالدیریلاردا تخمیناً 17 مین 210-و اوشاق، 11 مین 742-سی قادین اولماقلا 43 مین 508 فیلیسطین‌لی حیاتینی ایتیریب، 102 مین 684 نفر ایسه یارالانیب.
داغینتیلار آلتین‌دا هله ده مینلرله اؤلو اولدوغو بیلدیریلرکن، اینسانلارین سیغیندیغی خسته‌خانا و تحصیل موسسیسه‌لری هدف آلیناراق سیویل آلت یاپی دا محو ائدیلیر.
