مارک روته و گونئی کره پرزیدنتی یون سوک یول آراسیندا تلفون دانیشیغی اولوب
ناتو و گونئی کره، قوزئی کره‌نین روسیایا عسگر گؤندرمه‌سینه بیرگه جاواب وئرمک اوچون امکداش‌لیق‌لارینی موذاکیره ائده‌رک گلوبال تهلوکه‌سیزلیگه قارشی بو آددیمی "دؤنوش نقطه‌سی" کیمی قیمتلندیردی.
ناتو باش کاتیبی مارک روته و گونئی کره پرزیدنتی یون سوک یول، قوزئی کره‌نین روسیایا عسگر گؤندرمه‌سینه وئریله‌جک بیرگه جاوابی موذاکیره ائتمک اوچون تلفون دانیشیغی آپاردی‌لار.
مارک روته، "ایکس" سوسیال شبکه‌سینده ائتدیگی پای‌لاشیمدا، یون ایله قوزئی کره‌نین روسیایا عسگر گؤندرمه‌سی قونوسونو بیر داها موذاکیره ائتدیک‌لرینی و بو حرکتی "گلوبال تهلوکه‌سیزلیک اوچون دؤنوش نقطه‌سی" اولا‌راق خاراکتریزه ائتدیگینی بیلدیردی.
باش کاتیب، "بو تهدیدلره بیرلیکده قارشی دورماق اوچون هیند-ساکیت اوقیانوس طرفداش‌لاریمیزلا علاقه‌لریمیزی گوجلندیریریک" مئساژینی پای‌لاشدی.
روته، همچنین قوزئی کره بیرلیک‌لری‌نین بیر نئچه گون عرضینده اوکراینایا قارشی ساواشا قاتیلماسی‌نین گؤزلنیلدیگینی قئید ائده‌رک، "بو وضعیتین سبب اولاجاغی میثلی گؤرونمه‌میش تهلوکه‌سیزلیک بحرانینا قارشی عینی دوشونجه‌ده اولان اؤلکه‌لر آراسیندا هم رای‌لیگی گوجلندیرمه‌نین واجیب‌لیگینی" وورغولادی.
یونهاپ آژانسینا گؤره، یون، اوکراینا‌لی خصوصی نوماینده‌نین گونئی کره‌یه سفر ائدجگینی و ناتو ایله یاخین تماسین داوام ائتدیریله‌جگینی بیلدیردی.
روسیا پرزیدنتی ولادیمیر پوتین ژوئن آییندا قوزئی کره‌یه رسمی سفر ائتمیش و طرف‌لر آراسیندا "احاته‌لی ایستراتژی طرفداش‌لیق موقاویله‌سی" ایمضالانمیشدی.
اوکراینا پرزیدنتی ولودیمیر زلنسکی، 25 اوکتبردا وئردیگی آچیقلامادا، روسیانین قوزئی کره عسگرلرینی 27-28 اوکتبر تاریخ‌لرینده ایلک دؤیوش بؤلگه‌لرینه یئرلشدیرجگینی اؤیرندیک‌لرینی آچیقلامیشدی.
امریکا، روسیادا تخمینن 10 مین قوزئی کره عسگری‌نین اولدوغونو و اونلاردان 8 مینی‌نین اوکراینا سرحدینه یاخین کورسک بؤلگه‌سینده یئرلشدیریلدیگینی آچیقلامیشدی.
