ترامپ: تاریخ یازدیق!

جمهوریتچی نامزد دونالد ترامپ آمریکادا پرئزیدئنتلیک یاریشیندان سونرا ظفر دانیشماسیندا «بیز تاریخ یازدیق، باشاردیق» دئدی. 

ایلک غیررسمی نتیجه‌لرین آچیقلانماسی ایله‌ دونالد ترامپ فلوریدادا ائتدیگی چیخیشدا غلبه‌سینی اعلان ائتدی.

ترامپ سئچکینین نتیجه‌سینی «تاریخی و سیاسی غلبه‌» آدلاندیریب.

ترامپ، "بیز تاریخ یازدیق. ۴۷-جی جمهور باشقانینی سئچدیغینیز اوچون تشکور ائدیرم. من سیزین اوچون هر گون موباریزه آپاراجاغام. بو، آمریکا اوچون قیزیل دؤور اولاجاق. بو، آمریکا اوچون بؤیوک غلبه‌دیر" دئدی.

آمریکا پرئزیدئنتی ۵۳۸ نفردن عیبارت «سئچکی شوراسی» معین ائدیر.

نامزد آغ ائوه وثیقه قازانماق اوچون ۲۷۰ نوماینده‌نین سسینی آلمالیدیر.

غیررسمی بیلگیلره گؤره، ترامپ ۲۶۷، دموکراتلارین نامزدی کامالا هریس ایسه ۲۲۴ نوماینده‌ قازاندی. 

سئچیجی قورولو نوماینده‌لری دسامبرین ۱۷-ده کیمین غالیب گلدیگینی اعلان ائده‌جکلر.

سئچکینین غالیبی ژانویه‌نین ۶-دا سئناتو طرفیندن تصدیقلنجک.

ژانویه‌نین۲۰-ده آمریکانین یئنی پرئزیدئنتی کونقره‌ده آند ایچه‌جک و آغ ائوده حاضیرکی پرئزیدئنت جو بایدن‌ین صلاحیتلرینی ایجرا ائده‌جک.

سئچکیده ۴۳۵ یئرلیک نوماینده‌لر پالاتاسینین تامامی و ۱۰۰ نفرلیک سئناتوداکی ۳۴ یئر صاحیبلری‌ ده معینلشه‌جک.

غیررسمی نتیجه‌لره گؤره، جمهوریتچیلر هم نوماینده‌لر پالاتاسیندا، هم‌ده سئناتودا چوخلوغو الده ائدیبلر.