گورجوستان‌دا اعتراض یوروشو

اوکتیابرین 26-دا گورجوستان‌دا کئچیریلن و حاکم «گورجو آرزوسو» پارتیسینین غالیب گلدیگی پارلامئنت سئچکیلرینین نتیجه‌لرینی قبول ائتمه‌ین موخالیفت پارتیلاری دونن پایتاخت تیفلیس‌ده اعتراض یوروشو کئچیریب.

دیگومی بؤلگه‌سین‌دکی اوست محکمه‌سی قارشیسینا توپلاشان موخالیفت پارتیلرینین لیدئرلری و طرفدارلاری حکومتی سئچکیلرده «آلداتماق‌دا» اتهام ائد‌رک، نتیجه‌لری تانیمادیقلارینی بیان ائدیبلر.

موخالیفت لیدئرلری سئچکیلرین یئنی‌لنمه‌سینی طلب ائد‌رک، عکس حال‌دا هر گون موختلیف نقطه‌لرده نوماییشلرینی داوام ائتدیره‌جکلرینی قئید ائدیبلر.

سئچکیلرده 5 فایزلیک سددی کئچن موخالیفتین «دگیشیک‌لیکلر کوالیسیونو»، «گورجوستانی قورتارماق اوچون بیرلیک» و «گوج‌لو گورجوستان» سئچکی بلوکلارینین لیدئرلری چیخیشلارین‌دا، بو گون یئنه تیفلیس اوست محکمه‌سی قارشیسینا توپلاشاجاقلارینی بیلدیریبلر.

سئچکی سیررینین پوزولماسی ایله باغلی محکمه‌دن بو گون قرار وئرجگینی گؤزلدیکلرینی بیل‌دیره‌ن نوماییش‌چیلر محکمه‌نی «عدالت‌لی» اولماغا دعوت ائدیبلر.

داها سونرا نوماییش‌چیلر بعضی پروسپئکت و کوچه‌لری موقتی اولاراق نقلیاتین حرکتینه باغلایاراق، حکومت علیهینه شوعارلار سسلن‌دیره‌رک یوروش ائدیبلر.

گورجوستان و آوروپا بیرلیگی بایراقلاری داشییان نوماییش‌چیلرین اعتراضی آخشام ساعاتلارین‌دا باشا چاتیب.

اوکتیابرین 26-دا گورجوستان‌دا کئچیریلن پارلامئنت سئچکیلرین‌ده حاکم گورجو آرزوسو پارتیسی 53.93 فایز سسله غالیب گلیب.

«دگیشیک‌لیک اوچون کوالیسیون» 11.03 فایز سسله ایکینجی، «گورجوستانی قورتارماق اوچون بیرلیک» 10.16 فایزله اوچونجو، «گوج‌لو گورجوستان» 8.81 فایزله دؤردونجو، «گورجوستان اوچون قاخارییا» بئشینجی یئرده قرارلاشیب.

گورجوستان پرئزیدئنتی سالوم زورابیشویلی و سئچکی سددی کئچن موخالیفت پارتیلری سئچکیلرین ساختالاشدیریلدیغینی ادعا ائد‌رک، سئچکینین نتیجه‌لرینی تانیماییب.

زورابیشویلی، اوکتیابرین 27-ده وئردیگی آچیقلامادا "روسیانین خصوصی عملیاتی کیمی تانیملانابیله‌جک بیر حادثه‌نین قوربانی اولدوق. خالقیمیزا و اؤلکه‌میزه قارشی یئنی نؤوع هیبرید ساواش تطبیق اولوندو" دئییب.

گورجوستانین باش ناظیر ایراک‌لی کوباخیدزه سئچکیلرین رقابت‌لی و شفاف موحیط‌ده دئموکراتیک کئچیریلدیگینی، سئچکیلری تانیمایانلارین «اؤلکه‌ده غیری-ثابت‌لیک یاراتماغا چالیشدیقلارینی» بیان ائدیب.

گورجوستان پروکورورلوغونون اوکتیابرین 30-دا وئردیگی آچیقلاما‌دا پارلامئنت سئچکیلرین‌ده "ساختاکارلیق" ادعالاری ایله باغلی آراش‌دیرمالارا باشلانیلدیغی بیلدیریلیب.