آنتونی بلینکن: لبنان ایله ایسرائیل آراسینداکی آتیشکس گؤروشمه‌لرینده ایر‌لیله‌مه وار
"داها ائد‌جک چوخ ایشیمیز وار آنجاق آتیشکس ده داخیل، دیپلوماتیک بیر حله چاتمامیز اوچون لازیم‌اولان شئی بودور"
آمریکا بیرلشمیش دؤولتلری خاریجی ایشلر ناظیری آنتونی بلینکن، لبنان ایله ایسرائیل آراسیندا ایجرا ائدیله‌ن آتیشکس گؤروشمه‌لرینده ایر‌لیله‌مه اولدوغونو سؤیله‌دی.
مطبوعات کونفرانسیندا دانیشان بلینکن، بیرلشمیش میللتلر تهلوکه‌سیزلیک شوراسینین ۱۷۰۱ ساییلی قرارینین تطبیق اولونا بیلمه‌سی مقصدی ایله "سیخ چالیشما" ایجرا ائتدیکلرینی ایفاده ائتدی.
ایسرائیل ایله لبنان آراسیندا بیرلشمیش میللتلر تهلوکه‌سیزلیک شوراسینین بو قراری تملینده آتیشکسه چاتماق اوچون "یاخشی بیر ایر‌لیله‌مه" اولدوغونو ایفاده ائد‌ن بلینکن، "داها ائد‌جک چوخ ایشیمیز وار آنجاق آتیشکس ده داخیل، دیپلوماتیک بیر حله چاتمامیز اوچون لازیم‌اولان شئی بودور" دئدی.
بلینکن، غزه‌ده‌کی اینسانی وضعیتده ده یاخشیلاشما اولدوغونو آنجاق کافی اولمادیغینی، کؤمک تریلیلرینین بؤلگه‌یه گیریشی قدر پایلامالارین دا تأثیرلی شکیلده ائدیلمه‌سینین اهمیتلی اولدوغونو سؤیله‌دی.
وال ایستریت ژورنال (WSJ) قزئتی، آمریکادان بیر هیئتین ایسرائیل ایله لبنان آراسینداکی چاتیشمالاری دایاندیرماق اوچون حاضیرلادیقلاری "لایحه راضیلاشما" اوزرینده ایسرائیل‌‌لی مسئوللارلا گؤروشمه‌لر ایجرا ائتدیگینی ایفاده ائتدی.
خبرده، لایحه راضیلاشمادا، ایسرائیل‌ین "اؤزونه قارشی تهدیدلری آرادان قالدیرماق" مقصدی ایله لبنان‌ا هوجوملارینی ۶۰ گون داها داوام ائتدیرمه‌سینین تکلیف ائدیلدیگی ادعا ائدیلدی.
آیریجا، ایسرائیل عسگرلرینین بیر هفته ایچینده لبنان تورپاقلارینی ترک ائتمه‌سی و بیرلشمیش میللتلر تهلوکه‌سیزلیک شوراسینین ۱۷۰۱ ساییلی قراری تملینده "حزب‌الله و دیگر سلاحلی قروپلارین تمیزله‌نمه‌سی" اوچون لبنان اوردوسونون دؤوره‌یه گیرمه‌سی مؤوضوعلارینی دا احتیوا ائتدیگی قئید ائدیلدی.
ایلگیلی‌لی خبرلر
آوروپا بیرلیگی کمیسیونو: تورکیه اساس طرفداش و نامزد اؤلکه اولماغا داوام ائدیر
آوروپا بیرلیگی کمیسیونونون یئنی سؤزچوسو ایلک دفعه ژورنالیستلرله گؤروشوب
