کانادا ایلک دفعه هیندیستانی «سیبر تهلوکه‌» اولاراق تعیین ائدیب

خاریجیلرین بیلگی‌سایار شبکه‌لرینه سیزماسینین قارشیسینی آلماقدان مسئول اولان کانادانین سیبرمودافیه آژانسی، هیندیستانی ایلک دفعه اولاراق «سیبر تهدید» اولاراق تعیین ائدیب.

کانادا سیبر گوونلیک مرکزی اؤلکه‌ده قوروملارین و وطنداشلارین اوزلشدیگی «سیبر تهدیدلره‌» توخونان «میللی سیبر تهلوکه‌لرین دگرلندیریلمه‌سی (NCTA)» آدلی گزارشینی درج ائدیب.

هیندیستانی ایلک دفعه اولاراق «سیبر تهدید» اولاراق تعیین ائدن گزارش‌ده، هیندیستان‌ین کانادا حؤکومت شبکه‌لرینه جاسوسلوق ائتمک مقصدی ایله سیبر فعالیتلر حیاتا گئچیردیگی ادیعا ائدیلیب.

ایکی ایلدن بیر درج ائدیلن گزارش‌ده هیندیستان و کانادا آراسینداکی موناسیبتلرین پیسلشمه‌یه داوام ائتدیگی اوچون هیندیستان‌ین سیبر تهدیدلرینین آرتاجاغی وورغولانیب.

گزارش‌ده چین، قوزئی کره، ایران و روسیه‌نین ده کانادایا قارشی «سیبر تهدیدلر» ائتدیگی و چین‌ین سیبرهوجوملارینین «رقیبسیز» اولدوغو و کانادانین سیبر گوونلیغینه "ان بؤیوک تهدید" اولاراق گؤرولدویو بیلدیریلیب.

گزارش‌ده چین‌ین سیبرهوجوملارینین اقتیصادی و حربی ساحه‌ده اوستونلوک تامین ائده‌جک بیلگی توپلاماق مقصدی داشیدیغی وورغولانیب.