دونیانین موختلیف یئرلرینده ایسراییله قارشی اعتراض آکسیا‌لاری کئچیریلیب

ایسراییلین غزه‌ده، اردون چایی‌نین باتی ساحلینده و لوبنان‌داکی قتل عام لارینا دونیانین موختلیف یئرلریندن اعتراضلار یوکسلیر.

کانادانین تورونتو شهرینده فیلیسطین و لوبنانا دستک میتینقی کئچیریلیب. ایسراییلین قتل عام لارینا اعتراض ائدن آکسیاچی‌لار پلاکات‌لار و فیلیسطین بایراق‌لاری ایله بیر آرایا گله‌رک "آزاد فیلیسطین" شعارلاری سسلندیریب‌لر. بعضی اعتیراضچی‌لار اؤتن هفته ایسراییل طرفیندن اؤلدورولن "حماس" سیاسی بوروسونون رهبری یحیی سنوارین فوتوسونو داشیییب.

برزیل‌ین سائوپائولو شهرینده توپ‌لاشان اعتیراضچی‌لار دا ایسراییل اوردوسونون حیاتا کئچیردیگی ساواش‌لاری گؤز قارشی‌سینا گتیرمک، غزه و لوبنانا یؤنه‌لن هوجوم‌لارا اعتراض ائتمک اوچون آکسیا تشکیل ائدیب‌لر. فیلیسطین و لوبنان بایراق‌لاری ایله پانکارت‌لار قالدیران و اورایا دستک وئرن اعتیراضچی‌لار هوجوم‌لارین دایاندیریلماسینی طلب ائده‌رک عدالت و باریش ایسته‌ییب‌لر.

بلژیک‌ده مین‌لرله اینسان ایسراییلین هوجوم‌لارینا اعتراض ائدیب. پایتاخت بروکسل‌ده‌کی شیمال دمیریولو ایستاسیونو اؤنونده بیر آرایا گلن آکسیاچی‌لار "ایسراییلین سلاحلاندیریلماسینی دایاندیرین" چاغیریشی ائدیب‌لر. امریکا و آوروپا اتفاقینا ایسراییله وئردیک‌لری دسته‌یه گؤره اعتراض بیلدیریلیب.

مراکش‌ین باتی بؤلگه‌سینده یئرلشن کازابلانکا شهرینده ده مین‌لرله اینسان اللرینده فیلیسطین بایراق‌لاری ایله یوروش ائدیب. اعتیراضچی‌لار ایسراییلین لوبنان و فیلیسطینه یؤنه‌لن هوجوم‌لاری‌نین دایاندیریلماسینی طلب ائدیب‌لر.