هریس، ایسرائیلی علاوه آددیملار آتماغا چاغیریب

آمریکانین باشقان یاردیمجیسی و دئموکراتلار پارتیسیندن جمهور باشقانلیغا نامزد کامالا هریس، ایسرائیلی غزه‌ده ائحتیاجی اولانلارین اینسانی یاردیما چاتماسینی آسانلاشدیرماق اوچون علاوه آددیملار آتماغا چاغیریب.

هریس، بیرلشمیش میلتلر تشکیلاتی‌نین دونیا ارزاق پروقرامینداکی آچیقلاماسی ایله باغلی X حئسابیندا یازدیغی یازیدا دئدی: "بیرلشمیش میلتلر تشکیلاتی بیلدیریب کی، تخمینا ایکی هفته‌دیر غزه‌نین قوزئیینه ارزاق داخیل اولماییب. ایسرائیل تعجیلی اولاراق ائحتیاجی اولانلارا یاردیم آخینینی آسانلاشدیرماق اوچون داها چوخ ایشلر گؤرمه‌لیدیر". 

بؤلگه‌دکی غیرنظامی اهالینین قورونماسی و اونلارین یئمک، سو و طیبی خیدمتلره چاتماسینین تامین ائدیلمه‌سینین واجیبلیگینه دقت چکن هریس، همچینین بین‌الخلق اینسانی حقوقا حؤرمت ائدیلمه‌سینین واجیبلیگینی وورغولادی.

بیرلشمیش میلتلر تشکیلاتی‌نین دونیا ارزاق پروقرامینین اکتبرون ۱۲-ده یایدیغی آچیقلامادا غزه‌نین قوزئیینه گئدن اساس گئچیدلرین باغلاندیغی و اکتبرون ۱-دن اعتباراً بؤلگه‌یه ارزاق یاردیمینین داخیل اولمادیغی بیلدیریلیب.

آچیقلامادا بیلدیریلیب کی، غزه‌نین قوزئیینده یئمک پایلاما منطقه‌لری، مطبخلر و چؤرک‌خانالار، هاوا هوجوملاری و تخلیه امرلری کیمی فاکتورلارا گؤره باغلانمالی اولوب.