دونیا ساغلیق تشکیلاتی‌: غزه‌نین قوزئیینده هئچ بیر ساغلیق خیدمتی قالمامیش

دونیا ساغلیق تشکیلاتی‌نین باش دیرئکتورو تئدروس آدهانوم قبریسوس، ایسرائیل‌ین یاردیم مامورلارینین داخیل اولماسینا مانع اولماغا داوام ائتدیگی غزه‌نین قوزئیینده دئمک اولار کی، هئچ بیر ساغلیق خیدمتینین قالمادیغینی آچیقلادی.

قبریسوس X حئسابینداکی یازیسیندا دونیا ساغلیق تشکیلاتی‌نین غزه‌نین قوزئییندکی ایکی ماموریتینین یئنیدن بلوکلاندیغینی و گیریشه ایجازه وئریلمه‌دیگینی بیلدیریب.

ایسرائیل-ه مجبوری یئردَییشمه‌نی دایاندیرماق و خسته‌خانالاری قوروماق اوچون خبردارلیق ائدن قبریسوس، "غزه‌نین قوزئیینده دئمک اولار کی، هئچ بیر ساغلیق خیدمتی قالماییب. اینسانلارین گئده‌جک یئرلری یوخدور" دئییب.

قبریسوس همچینین ایسرائیلی اینسانی یاردیملارین گیریشینی آسانلاشدیرماغا چاغیریب دئییب: "حیات بوندان آسیلیدیر. آتیش‌کس اوچون چالیشین. بو موناقیشه‌ده ایلیشیب قالان بوتون اینسانلارین باریشا ائحتیاجی وار".

اینگیلیستان، فرانسه، آمریکا و سوئیس‌ین غیرحؤکومت تشکیلاتلاری دا داخیل اولماقلا ۱۸ بین‌الخلق یاردیم تشکیلاتی بیرگه آچیقلامادا غزه‌نین قوزئیینده آرتان گرگینلی‌گین اینسانی فلاکتله نتیجه‌لنجه‌یی باره‌ده خبردارلیق ائدیب.

اولوسلار آراسی یاردیم تشکیلاتلاری ایسرائیل‌ین فیلیسطین‌لیلری غزه‌نین قوزئیینده مجبوری کؤچورمه‌سینین اینسانی وضعیتی داها دا آغیرلاشدیراجاغینی و اینسانی یاردیم عملیاتلارینا مانع اولاجاغینی دئمیشدی.