اینگیلترهده ۳۷ محکوم سهواً ائرکهن سربست بوراخیلدی
اینگیلتره عدالت ناظیرلیگیندن بیر مسئول، ۱۰ سپتامبردا باشلادیلان ائرکهن تخلیه پروگرامی داخیلینده ۳۷ محکومون سهواً سربست بوراخیلدیغینی ایفاده ائتدی
اینگیلترهده ۳۷ محکومون حبسخانادان سهواً ائرکهن سربست بوراخیلدیغی اورتایا چیخدی.
اینگیلتره عدالت ناظیرلیگیندن بیر مسئول، ۱۰ سپتامبردا باشلادیلان ائرکهن تخلیه پروگرامی داخیلینده ۳۷ محکومون سهواً سربست بوراخیلدیغینی ایفاده ائتدی.
مسئول، بو سهوین محکوملارین، یئنی قوهیه آلینان بیر آییننامه چرچیوهسینه داخیل ائدیلمهلری سببی ایله میدانا گلدیگینی سؤیلهدی.
ائرکهن چیخاریلان ۳۷ محکومدان ۵ی حبسخانایا دؤنمهدی.
عدالت ناظیرلیگی سؤزچوسو ایسه سکای نیوزا وئردیگی شرحده
"محکومیت قرارلاری هله اعتبارلیدیر و سوچلولار سربست بوراخیلدیقلاری آندان اعتباراً ایزلنیلمکدهدیر. یاخیندا حبسخانایا دؤنهجکلر" دئدی.
اینگیلتره و ولزدهکی حبسخانالارداکی حدیندن آرتیق قالابالیغی یونگوللشدیرمک مقصدی ایله، ۱۰ سپتامبردا مین ۷۵۰ محکوم ائرکهن چیخاریلمیشدی. گلهجک آی بنزر ساییدا محکومون داها سربست بوراخیلماسی پلانلانیر.
اؤته یاندان، اینگیلیس حکومتینین حبسخانالارداکی دولولوق نیسبتی سببی ایله استونیده حبسخانا کیرایه ائتمه پلانی اولدوغو دا گوندهمه گلمیشدی.
اینگیلتره و ولزده ۱۹۹۱-جی ایلده ۴۰ مین دولاییندا اولان محکوم ساییسی، قیسا بیر مدت اول ۸۸ مین ۵۲۱ نفره چیخاراق رکورد قیرمیشدی.
کیشی حبسخانالاریندا ایسه یالنیز ۸۳ نفرلیک بوش یئر قالدیغی ایفاده ائدیلمیشدی.
