روسیه لبنان‌داکی سالدیرینی قیناییب
روسیه لبنان‌دا چاغری جیهازلارینی پارتلاتماقلا ائدیلن سالدیرینی قیناییب.
روسیه لبنان‌دا چاغری جیهازلارینی پارتلاتماقلا ائدیلن سالدیرینی قیناییب.
روسیه خاریجی ایشلر ناظیرلیگینین سؤزچوسو ماریا زاخارووا وئردیگی یازیلی آچیقلامادا بو سالدیرینین "ترور حرکتی و لبنانا قارشی هیبرید ساواش" اولدوغونو وورغولاییب.
زاخارووا بیان ائدیب کی، "سالدیری ائد‌نلر یاخین شرق‌ده بؤیوک ساواشی قیزیشدیرماغا چالیشیردیلار."
سؤزچو زاخارووا، "لبنانا و اونون وطنداشلارینا قارشی اؤرنگی گؤرونممیش سالدیرینی شدتله قیناییریق. بو سالدیری لبنانین حاکمیتینی پوزور و غیری-عنعنوی سیلاحلاردان ایستیفاده ائتمکله بین الخالق حقوقو پوزور" دئدی.
روسیه سؤزچوسو، "بو حرکتلر گرگینلیین آرتماسینا سبب اولا و سون درجه تهلوکه‌لی نتیجه‌لره سبب اولا بیلر. بو ترور حرکتی ایله باغلی هرطرف‌لی آراش‌دیرما آپاریلمالی و جینایتکارلار مسئولیته جلب ائدیلمه‌لی‌دیر. بوتون طرفلری تمکین‌لی اولماغا و یاخین شرق‌ده نیظامی و سیاسی ثابت‌لیگی پوزاجاق آددیملاردان قاچینماغا چاغیریریق" دئدی.
کرئملین سؤزچوسو دمیتری پئسکوو دا حادثه ایله باغلی پایتاخت موسکوادا ژورنالیستلره آچیقلاما وئریب و لبنان‌دا چاغری جیهازلارینی پارتلادیلماسینین بؤلگه‌ده وضعیتین گرگینلشمه‌سینه و ایداره اولونماز حالا گلمه‌سینه سبب اولابیله‌جگینی بیلدیریب.
دونن حزب الله عضولرینین ایستیفاده ائتدیگی چاغری جیهازلارینی اؤلکه داخیلین‌ده پارتلادیلیب.
حادثه نتیجه‌سین‌ده 2سی اوشاق اولماقلا 12 نفرین اؤلدویو، تخمیناً 2800 نفرین یارالاندیغی آچیقلانیب.
300 نفرین وضعیتینین آغیر اولدوغو بیلدیریلیب.
لبنان مقاملاری حادثه‌یه گؤره ایسرائیلی مسئولیت داشیسا دا، ایسرائیل هله‌لیک مسئله ایله باغلی آچیقلاما وئرمه‌ییب.
ایسرائیل-لبنان سرحدین‌ده 2023-جو ایل اوکتیابرین 8-دن بو یانا داوام ائد‌ن قارشی‌دورمالاردا سون گونلر گرگینلیین آرتدیغی موشاهیده ائدیلیب.
ایلگیلی‌لی خبرلر
ایسرائیللی‌لر سیاسی و امنیتی سببلر ایله خاریجه مهاجیرت ائتمه‌یی دۆشونور
ایسرائیل‌ده ۲۰۲۴-جۆ ایلین ایلک ۷ آیی عرضینده ۴۰ مین‌دن چوخ اینسان اؤلکه‌نی ترک ائدیب
